Maharashtra Politics Live : ...पण आम्ही भाजपसोबतच राहू; रवींद्र चव्हाणांच्या इशाऱ्यानंतर तटकरेंची प्रतिक्रिया

2 डिसेंबरपर्यंत आम्हाला महायुती टीकवायचीय, असं सूचक विधान भाजप प्रदेशाध्यक्ष रविंद्र चव्हाण यांनी केल्यामुळे राज्यात खळबळ उडाली आहे. अशातच आता राष्ट्रवादीचे प्रदेशाध्यक्ष सुनील तटकरे यांनी देखील युतीबाबत मोठे वक्तव्य करत रवींद्र चव्हाण 2 डिसेंबरनंतर कोणता निर्णय घेतील याची माहिती नाही. पण राज्यात काहीही होवो आपली राष्ट्रवादी भाजपसोबतच असेल असे म्हटलं आहे. यामुळे राज्यात पुन्हा खळबळ उडाली आहे.

रायगडमध्ये शिवसेना भाजपमध्ये सुरु असलेल्या वादाचा मुद्द्यावर आदिती तटकरे यांनी बोलताना, मी स्वतःहून कोणा सोबत वाद करायला जात नसते. कोणाच्या मतदार संघात हस्तक्षेप करायला जात नसते. माझी तशी कार्यपद्धती नाही. याच वेळी देवेंद्र फडणवीस, अजितदादा, एकनाथ शिंदेचे सहकार्य मला लाभते अस सांगत विकासात्मक दृष्ट्या जिल्हा आणि तालुका पुढे नेण्याकडे आमचा कल असतो. एकमेकांवर टिका करून कोणाचा फायदा होत नसतो, लोक त्याचा इंटरटेंमेंट म्हणून बघत असतात असे स्पष्टीकरण आदिती तटकरे यांनी दिलं आहे.

भाजपचे प्रदेशाध्यक्ष रवींद्र चव्हाण यांनी उपमुख्यमंत्री एकनाथ शिंदेना नाव न घेता चिमटा काढला आहे. दोन नंबर तो दोन नंबरच असतो असे म्हणत आर आर पाटील यांच्या जुन्या भाषणाचा संदर्भ देऊन चिमटा काढला. नंबर दोनला काही किंमत नसते असे म्हणत जो भी है देवाभाऊ ही है, देवा भाऊ सबका भाऊ अशा शब्दात प्रदेशाध्यक्ष रवींद्र चव्हाण यांचा विट्यात भाजपा सभेत एकनाथ शिंदेवर अप्रत्यक्ष निशाणा साधला.

तळकोकणात भाजप आणि शिवसेनेत मोठा वाद सुरू झाला असून युतीही तुटली आहे. यामागे भाजपचे प्रदेशाध्यक्ष रवींद्र चव्हाण असल्याची टीका आमदार निलेश राणे यांनी केली होती. तसेच भाजप कार्यकर्त्यांच्या घरावर स्टिंग ऑपरेशन करत पैसांची बॅग माध्यमांच्या समोर आणली होती. तर हे पैसे मतदारांना देण्यासाठी आणल्याचा दावा त्यांनी केला होता. ज्यानंतर आता त्यांच्यावर गुन्हा दाखल करण्यात आला आहे. यावरून भारतीय जनता पक्षाचे नेते नितेश राणे यांनी निलेश राणे यांच्याविषयी मोठे विधान केले. त्यांना बळीचा बकरा बनवले जात असून इतर शिवसेना नेत्यांकडून अपेक्षित समर्थन मिळत नसल्याचा आरोप त्यांनी केला.

काही दिवसांपूर्वी एका प्रचारसभेत अजित पवार यांनी तिजोरीच्या चाव्या माझ्याकडे आहेत. निधी मी देतो, त्यामुळे घड्याळाला मतदान करा, असं वक्तव्य केलं होतं. यावर आता भाजपचे आमदार गोपीचंद पडळकर यांनी जोरदार टोला लगावला आहे. ‘तिजोरी जरी तुमच्याकडे असली, त्याच्या चाव्या जरी तुमच्याकडे असल्या तरी, तिजोरी ज्या खोलीत आहे. ती खोलीच आमची आहे. त्या खोलीचा मालकच आमचे देवेंद्र फडणवीस आहेत, असे म्हणत टीका केली आहे.

दोन नंबर तो दोन नंबरच असतो, नंबर दोनला काही किंमत नसते असं भाजपचे प्रदेशाध्यक्ष रवींद्र चव्हाण यांनी म्हंटलंय. आर आर पाटील यांच्या जुन्या भाषणाचा संदर्भ देऊन रवींद्र चव्हाण यांनी विटा मधील नगरपरिषदेच्या प्रचारसभेत हे वक्तव्य केलं आहे. रवींद्र चव्हाण यांच्या या वक्तव्याच्या नेमका रोख कुणावर याची राजकीय वर्तुळात चर्चा सुरू झाली आहे. जो भी है देवाभाऊ ही है, देवा भाऊ सबका भाऊ दोन नंबर तो दोन नंबरच असतो असेही रवींद्र चव्हाण म्हणाले. 

सरपंच संतोष देशमुख यांच्या हत्येला आज एक वर्ष पूर्ण होतंय… एक वर्षांत ना न्याय, ना आरोपींना अटक. हा खटला फास्ट ट्रॅक कोर्टात चालवू ही सरकारची घोषणा हवेतच विरलीय. असंच चालू राहिलं तर संतोष देशमुख, महादेव मुंडे, सोमनाथ सूर्यवंशी यांना न्याय कधी मिळणार? हे तिन्ही खून राजकीय व्यवस्थेच्या आश्रयाने झाल्याने या तिन्ही खुनातील आरोपींना शिक्षा होईल की नाही, ही शंका खरी ठरतेय की काय असं दिवसेंदिवस वाटत आहे. जसजसा वेळ जाईल तसतशी या प्रकरणांची तीव्रता कमी होत जाईल आणि सरकारकडून नेमका वेळकाढूपणाच सुरु आहे. त्यामुळं न्याय कधी मिळणार हा प्रश्न कायम असल्याची टीका राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी केली आहे.

महाराष्ट्रातील नगरपालिका, नगरपंचायत निवडणुकीत भाजप 200 नगराध्यक्ष पदाच्या निवडणुका जिंकेल असा विश्वास मंत्री चंद्रकांत पाटील यांनी व्यक्त केला. प्रचाराला उस्फूर्त प्रतिसाद मिळत आहे, ही धरुन आणलेली गर्दी नाही.  देवेंद्र फडणवीस, आम्ही  फिरतोय, त्यामुळं या निवडणुकीत बिहार सारखं आणि महाराष्ट्र विधानसभा सारखं यश मिळेल असा आम्हाला विश्वास असल्याचे पाटील म्हणाले. 

संतोष देशमुख यांना श्रद्धांजली अर्पण करतो. अजूनही डोळ्यासमोर तो व्हिडिओ दिसतो. त्याला अन्नाचा कण जात नाही. या संवेदना आहेत. त्या नराधमाला फाशी झाल्याशिवाय आम्हाला चैन पडणार नाही. या प्रकरणावर समाधान हा विषयच नाही. ही हत्या करणाऱ्याच्या मागं पडद्यामागं जे कोणी आहेत त्या सर्वांना शिक्षा झाली पाहिजे, अशी अपेक्षा बीडचे खासदार बजरंग सोनवणे यांनी व्यक्त केली. माझं म्हणणं आहे की तुम्ही मोकळ्या वातावरणात एकदा तपास करा. शेवटच्या टोकापर्यंत जा . जर तुम्ही तपासाच थांबवत असाल तर अवघड आहे. एसआयटी, सीआयडी यांचा तपास सुरू असतानाही तपासावर एक कॅप टाकली आहे. ही कॅप  काढा आणि खुलेआम तपास करा.

काँग्रेसची  विचारधारा ही सर्व धर्म समभावाची आहे तर भाजपची विचारधारा ही सर्वधर्म भेदभावाची आहे, असं म्हणत काँग्रेस आमदार अमित देशमुख (Amit Deshmukh)  यांनी भाजपवर टीका केली. पक्ष फोडले आमदार फोडले आता मतदारांना पैशाचे आमिष दाखवून फोडण्याचा प्रयत्न केला जात आहे. मराठवाडा ही संतांच भूमी म्हणून ओळखली जायची पण आता सैतानाची भूमी म्हणून ओळख निर्माण होत असल्याचे देशमुख म्हणाले.  

कोल्हापूर जिल्ह्यातील शिरोली येथे 2011 साली झालेल्या ऊस आंदोलनातून स्वाभिमानी शेतकरी संघटनेचे अध्यक्ष माजी खासदार राजू शेट्टी यांच्यासह 80 जणांची निर्दोष मुक्तता करण्यात आली. कोल्हापूर सत्र न्यायालयात न्यायाधीश कश्यप यांच्या कोर्टात झालेल्या सुनावणीनंतर सर्वांची निर्दोष मुक्तता करण्यात आली. 16 वर्षानंतर हा निकाल लागल्याने आंदोलनातील शेतकऱ्यांनी न्यायालयाच्या आवारातच एकमेकाला गळाभेट घेत आनंद व्यक्त केला. 

अजित पवार यांच्या पक्षाच्या नेत्या रुपाली ठोंबरे नाराज आहेत. त्यामुळेच त्या एकनाथ शिंदे यांच्या शिवसेना पक्षात जाण्याच्या तयारीत असल्याचे बोलले जात आहे. रुपाली पाटील यांनी नुकेतच शिंदे यांच्या पक्षाचे खासदार श्रीकांत शिंदे यांचे मुंबईत भेट घेतली आहे. विशेष म्हणजे रूपाली पाटील यांच्यासोबत काँग्रेसच्या संगीता तिवारी आणि शिंदे गटाच्या शर्मिष्ठा येवले यादेखील उपस्थित होत्या. त्यामुळे रुपाली ठोंबरे लवकरच शिंदे यांच्या शिवसेनेत दाखल होण्याची शक्यता व्यक्त केली जात आहे.

वृक्षप्रेमी तपोवनात आलेत. त्यांनी राग व्यक्त केला. मात्र कुंभमेळा बारा वर्षात एकदा येतो. वृक्ष तोडणीच्या बाबतीत सरकारची भूमिका स्पष्ट आहे. आम्ही वृक्षप्रेमी आहोत” असं गिरीश महाजन म्हणाले. काही झाड काढणार आहोत. एका झाडाला दहा झाड लावणार. हजार झाड काढणार असून त्याच्या बदलत 15000 झाडं लावणार. झाडे लावण्याचे काम सुरू झाले असून हैदराबादवरून झाडं आणणार आहोत. आम्ही लावणार असलेल्या झाडांमुळे जंगल वाढणार आहे” असे मंत्री गिरीश महाजन यांनी स्पष्ट केले. सरसकट झाड तोडत नाही आहोत. झाडं तोडून त्या ठिकाणी रेस्टॉरंट बांधणार नाही, असेही महाजन यावरून सुरू असलेल्या वादावर म्हणाले.

दोन नंबर धंदे करणारा आमचा एक जरी उमेदवार उभा असेल तर त्यांनी नाव घेऊन सांगावं, मी समोरच्याला बिनविरोध करेल. खोटं बोलायचं, लोकांची बदनामी करायचं हे काम भाजप करत आहे, अशा शब्दात शिवसेना शिंदे गटाचे आमदार किशोर पाटील यांनी भाजप प्रदेशाध्यक्ष रवींद्र चव्हाण यांना प्रत्युत्तर दिले. आमचा एकही नगरसेवक निवडून येणार नाही असे म्हणणे म्हणजे सूर्यावर थुंकण्यासारखं सारख आहे. भाजपचा एखादा नगरसेवक निवडून आला तर खूप झालं. रवींद्र चव्हाण यांनी युती टिकवायची की नाही, हा महाराष्ट्राचा विषय आहे. परंतु, युती टिकवायची नाही हे मी 1 नोव्हेंबरलाच जाहीर केलेलं आहे, असे म्हणत किशोर पाटील यांनी भाजपवर जोरदार हल्लाबोल केला. 

(स्व.) संतोष देशमुख यांच्या कुटुंबीयांची भेट घेण्यासाठी उपमुख्यमंत्री अजित पवार हे मस्साजोगमध्ये पोचले आहेत. त्या ठिकाणी संतोष देशमुख यांचे बंधू धनंजय देशमुख, त्यांची मुलगी वैभवी देशमुख आणि गावकऱ्यांशी संवाद साधत आहेत. धनंजय देशमुख हे अजित पवार यांना या प्रकरणात न्याय द्यावा अशी मागणी करत आहेत

परळीतल्याला माझं एक सांगणं आहे. बघ तुला बदल करून घ्यायचा असेल तर घे. नसेल घ्यायचा तर नको घेऊ. यापुढे तरी शाहणा हो. तुझ्या अशा वागण्यामुळे आणखी वाईट दिवस येतील. त्यामुळे तू तसं वागू नको. जर का देशमुख कुटुंबाला धमक्या यायला लागल्या, तर आम्ही सहन करतो तिथंपर्यंत करतो नाही तर आम्ही भयानक निटुबा काढतो, असे सांगून मनोज जरांगे पाटील यांनी माजी मंत्री धनंजय मुंडे यांना नाव न घेता इशारा दिला आहे.

उपमुख्यमंत्री एकनाथ शिंदेंची अहिल्यानगर शेवगावमध्ये प्रचार सभा झाली. त्या सभेतूनच उपमुख्यमंत्री शिंदे यांनी उद्योगमंत्री उदय सामंत आणि पाणीपुरवठा मंत्री गुलाबराव पाटील यांना फोन लावला. गुलाबराव पाटील यांनी शेवगावसाठी नगरोथ्यान योजनेतून पाणी पुरवठा योजना मंजूर असून त्यातील त्रुटी आचारसंहिता संपल्यानंतर दूर करण्यात येतील, असे सांगितले. तसेच, उद्योगमंत्री सामंत यांना काकडे यांनी दिलेल्या जमिनीवर एमआयडीसी मंजूर करण्याचे आदेश दिले.

भाजपचे प्रदेशाध्यक्ष रवींद्र चव्हाण यांनी सिंधुदुर्ग आणि राणे कुटुंबीयांसाठी लोकसभला, विधानसभा निवडणुकीत काय काय केले, त्यांचं काय काय योगदाना आहे, हे आम्हाला माहिती आहे. नीलेश राणेंनी रवींद्र चव्हाण यांच्यावर केलेल्या आरोपांबाबत आम्ही दोन तारखेनंतर बसून चर्चा करू. पण रवींद्र चव्हाणांनी आमच्यासाठी काय केले, ते आम्ही कधीच विसरणार नाही. जगात असं कुटुंबात हेातं, असे मंत्री नीतेश राणे यांनी सांगितले.

संतोष देशमुख खूनप्रकरणी अटकेत असलेला वाल्मिक कराडची आठवण माजी मंत्री धनंजय मुंडे यांना राजकीय स्वार्थासाठी येत असावी. कदाचित कराडला मानणारे काही कार्यकर्ते असतील, ते फिरत नसतील म्हणूनच धनंजय मुंडेंना वाल्मिक कराडची आठवण येत असेल, असा संशय भाजप आमदार सुरेश धस यांनी व्यक्त केला आहे.

बोरीवलीचे भाजप आमदार संजय उपाध्यय यांना जीवे मारण्याची धमकी देण्यात आली आहे. एका पोस्टमनने मला हे पत्र आणून दिले आहे. संजय पत्रकार या नावाने मला हे पत्र आले आहे. बोरीवलीतील आठ लोक मला मारण्यासाठी प्रयत्न करत आहेत, असे त्या पत्रात नमूद केले आहे. या पूर्वी दोन वेळा माझ्यावर हल्ला करण्याचा प्रयत्न झालेला आहे, असेही आमदार उपाध्यय यांनी सांगितले.

संतोष देशमुख यांच्या हत्येला एक वर्षे पूर्ण झाले आहे. मात्र, या प्रकरणातील एक आरोपी अजूनही फरारी झाले आहेत. या प्रकरणात नावे आलेल्या सर्वांच्या मोबाईलचा सीडीआर काढला पाहिजे. आम्ही या प्रकरणी वकिलांच्या संपर्कात आहोत. जोपर्यंत वाल्मिक कराडला फाशी होत नाही, तोपर्यंत आम्ही शांत बसणार नाही, असा इशारा आमदार संदीप क्षीरसागर यांनी दिला आहे.

नगरपालिका निवडणुकीच्या प्रचारादरम्यान गोंदियात बोलताना जमिनीच्या पट्ट्यासाठी भाजपला मत द्यावं लागेल, असं विधान केलं होतं. त्यावर काँग्रेसचे आमदार नाना पटोले यांनी ‘तेरे बाप का राज है का’, तू कोन से खेत मूली है, असा सवाल करत त्यांच्यावर टीका केली होती. त्याला बावनकुळे यांनी प्रत्युत्तर दिले आहे. त्यांनी म्हटले आहे की, माझ्या बापाचा उल्लेख करणं नाना पटोले यांना महागात पडेल, असा इशारा दिला आहे.

देशात स्वच्छतेच्या बाबतीत प्रथम क्रमांक पटकावलेल्या सासवड नगरपालिकेच्या निवडणुकीत भाजप विरुद्ध शिवसेना असा सामना होत आहे. सासवड नगर परिषदेमध्ये गेली वीस वर्ष जगताप यांची एक हाती सत्ता राहिली आहे. जगताप काँग्रेसमध्ये होते ते आता भाजपमध्ये गेले आहेत.

स्थानिक निवडणुका स्वबळावर लढण्याची घोषणा काँग्रेसने केली आहे. यावरुन महाविकास आघाडीमध्ये नाराजी पसरली आहे. घटकपक्षांना विश्वासात न घेता केलेल्या घोषणेमुळे ठाकरे आणि शरद पवारांचा पक्ष नाराज असल्याची माहिती सूत्रांनी दिली.

कर्नाटकमध्ये मुख्यमंत्रिपदाचा वाद पेटला आहे. मुख्यमंत्री सिद्धरामय्या आणि उपमुख्यमंत्री डी. के. शिवकुमार या दोघांच्या वादात राहुल गांधी मध्यस्थी करणार असल्याची माहिती मिळत आहे. त्यामुळे मुख्यमंत्रिपदाचा वाद हा राहुल गांधी यांच्या कोर्टात गेला आहे. सिद्धरामय्या आणि डी. के. शिवकुमार दिल्लीत जाणार असल्याचे समजते. कर्नाटकमध्ये ऑपरेशन लोटस राबवणार जाणार का याबाबत चर्चा सुरु आहेत.

शिवसेनेचे आमदार निलेश राणे यांच्याविरोधात गुन्हा दाखल झाला आहे. बेकायदेशीरपणे घरात घुसल्याप्रकरणी मालवण पोलिसांनी त्यांच्याविरोधात कारवाई केली. निलेश राणे यांनी भाजप नेत्याच्या घरावर छापा टाकला होता यावेळी २५ लाख रुपयांची रोख रक्कम सापडली होती.

सांगली जिल्ह्यातील अरुण-ईश्वरपूर नगर परिषद निवडणुकीत भाजप महायुतीच्या प्रचारार्थ राज्याचे उच्च व तंत्रशिक्षण आणि सांगली जिल्ह्याचे पालकमंत्री चंद्रकांत पाटील यांनी दुचाकीवरून प्रवास करुन घरोघरी संपर्क केला. यावेळी प्रत्येक भेटीत मंत्री पाटील यांचे ही उत्साहात स्वागत करण्यात आले.

बदलापूर नगरपालिकेच्या निवडणुकीत अजित पवार राष्ट्रवादी काँग्रेस पक्षाच्या दोन महिलांना पैशांची पाकिट वाटताना एकनाथ शिंदे याच्या शिवसेना पक्षाच्या कार्यकर्त्यांनी रंगेहात पकडल्यानं राजकीय वर्तुळात एकच खळबळ उडाली होती. ही घटना बदलापूर पश्चिम भागतील पनवेलकर संकुल परिसरात घडली. याप्रकरणी बदलापूर पश्चिम पोलिस ठाण्यात विविध कलमानुसार गुन्हा दाखल करण्यात आला आहे. पैसे वाटपावरून शिवसेना उमेदवार तुकाराम म्हात्रे आणि राष्ट्रवादीचे उमेदवार प्रभाकर पाटील यांच्यात वाद झाला आहे.

मस्साजोगचे सरपंच संतोष देशमुख यांच्या हत्या प्रकरणाला आज एक वर्ष होत आहे. संपूर्ण राज्यामध्ये हे प्रकरण खूप गाजले. याच हत्या प्रकरणातील आरोपींना कठोर शिक्षा झाली पाहिजे, अशी मागणी कुटुंबियांनी गेल्या वर्षभरापासून केलेली आहे. संतोष देशमुख यांच्या प्रथम पुण्यस्मरण त्यानिमित्ताने समाधान महाराज शर्मा यांच कीर्तन देखील झालं. तर दुसरीकडे संतोष देशमुख यांच्या पत्नी, त्यांचे बंधू, मुल-मुलींच्या डोळ्यांमध्ये अश्रू आहेत.गावकऱ्यांच्या डोळ्यांमध्ये ही अश्रू होते.

कल्याण तालुक्यात धक्कादायक घटना समोर आली आहे. मुरबाड महामार्गावरील मामणोली गावाजवळ जुन्या वैमनस्यातून एकनाथ शिंदे यांच्या शिवसेना पक्षाचे पदाधिकारी किरण घोरड यांची धारदार शस्त्रांनी वार करत हत्या करण्यात आली. किरण घोरड हे गोवेली टिटवाळा इथले रहिवाशी आहेत. किरण घोरड यांच्यावर एका टोळक्याने अचानक राडा घालत जीवघेणा हल्ला चढवला.

निवडणुकीसाठी विरोधकांच्या घरात आणि बंगल्यात पैसे आले आहेत. कुणाचे ही पैसे, कुणाच्या बापाचे नाहीत ते आपलेच आहेत. कमिशन मधून कमावलेले आहेत. ते पैसे घ्या. पण मत भाजपलाच द्या, असं वादग्रस्त वक्तव्य ग्रामविकास मंत्री तथा सोलापूरचे पालकमंत्री जयकुमार गोरे यांनी केले आहे. कुर्डुवाडी इथल्या प्रचार सभेत बोलताना त्यांनी थेट मतदारांना मतदानासाठी पैसे घ्या, असा थेट सल्ला दिल्याने वाद निर्माण झाला

भाजपचे नगराध्यक्ष पदाचे उमेदवारासह पाच जणांनी 20 वर्षीय युवकाला मारहाण केल्याची तक्रार खेड पोलिसांकडे दाखल झाली आहे. रात्रीच्या वेळी पैसे वाटण्यावरुन झालेल्या गैरसमजातून मारहाण झाल्याचे तक्रारीत म्हटले आहे. या घटनेचा संपूर्ण प्रकार सीसीटीव्ही कॅमेऱ्यात कैद झाला असून मारहाण झालेल्या तरुणाचे नाव साई पिंगळे असे असून, निवडणुकीच्या पार्श्वभूमीवर झालेल्या या घटनेमुळे शहरात एकच खळबळ उडाली आहे.

अहिल्यानगर जिल्ह्यात वाढत्या मानव–बिबट्या संघर्षाच्या पार्श्वभूमीवर एआय आधारीत बनावट वन्यप्राणी व्हिडिओ तयार करून नागरिकांमध्ये भीती निर्माण करणाऱ्यांवर कठोर कायदेशीर कारवाई करण्यात यावी, अशा सूचना जिल्हा पोलीस अधीक्षक सोमनाथ घार्गे यांनी दिल्या.

अहिल्यानगर जिल्ह्यातील घटते लिंग गुणोत्तर रोखण्यासाठी सोनोग्राफी व गर्भपात केंद्रांची अचानक तपासणी, संशयित प्रकरणांची चौकशी व जन्म–मृत्यू नोंदी वेळेत करण्याच्या कडक सूचना जिल्हाधिकारी डॉ. पंकज आशिया यांनी दिल्या. कोणत्याही केंद्राकडून नियमांचे उल्लंघन झाल्यास कठोर कारवाई करावी, असे निर्देशही त्यांनी दिले.

महाराष्ट्र -छत्तीसगड राज्याच्या सीमेत मोठ्या प्रमाणावर नक्षली कारवाया घडवून आणणाच्या नक्षलवाद्यांच्या चळवळीला मोठा हादरा बसला आहे. आज घडलेल्या मोठ्या कार्यवाहीत दरेकसा दलमच्या 11 नक्षल्यांनी गोंदिया पोलिसांसमोर आत्मसमर्पण केले आहे. परिणामी, गोंदिया जिल्ह्यातून दरेकसा दलम जवळजवळ संपल्यात जमा झाल्याचे बोलले जात आहे.

आरक्षणाची मर्यादा ओलांडलेल्या जिल्हा परिषदांमध्ये बुलडाणा, यवतमाळ, नागपूर, चंद्रपूर, वर्धा आणि गडचिरोलीचा ठाणे, पालघर,जळगाव, हिंगोली, नांदेड, अमरावती, अकोला, वाशीम, नाशिक, धुळे, नंदुरबार, यांचा समावेश आहे.

32 जिल्हा परिषदांमध्ये निवडणूक होणार आहे. मात्र, 17 जिल्हा परिषदांमध्ये आरक्षणाची मर्यादा ओलांडल्याचे राज्य सरकारने कोर्टात कबूल केले आहे. कोर्टाच्या जानेवारीमधील निकालाचा परिणाम या निवडणुकीवर होऊ नये म्हणून दोन टप्प्यात निवडणूक घेण्याचा विचार निवडणूक आयोग करत आहे. संदर्भात 'साम टिव्ही'ने सुत्रांच्या हवाल्याने वृत्त दिले आहे.

पुणे जिल्ह्यातील नगरपरिषद व नगरपंचायत सार्वत्रिक निवडणूक २०२५ दरम्यान शांतता व सुरक्षितता राखण्यासाठी जिल्हादंडाधिकारी जितेंद्र डूडी यांनी भारतीय नागरीक सुरक्षा संहिता-२०२३ चे कलम १६३ अन्वये आदेश जारी केला आहे. या आदेशानुसार मतदान व मतमोजणीच्या ठिकाणापासून १०० मीटर परिसर प्रतिबंधित क्षेत्र म्हणून घोषित करण्यात आले आहे. या क्षेत्रात मतदारांव्यतिरिक्त इतर व्यक्तींना प्रवेश बंदी असून मतदान केंद्रावर २ डिसेंबर रोजी सकाळी ७.३० पासून मतदान पूर्ण होईपर्यंत तर मतमोजणी केंद्रावर ०३ डिसेंबर रोजी सकाळी ६.०० वाजेपासून मतमोजणी संपेपर्यंत निर्बंध लागू राहणार आहेत.

मुख्यमंत्री देवाभाऊ, तुम्ही मेट्रोचे जाळे विणा, रस्त्यांची निर्मिती करा, ‘बोगदा रस्ते’ बांधा. महाराष्ट्राचा कायापालट की काय तो जरूर करा, पण आधी गरीब, दुर्गम आदिवासी भागाकडे बघा. तेथे किमान बरे रस्ते होतील, आदिवासींना आरोग्य सुविधा आणि रुग्णवाहिका मिळेल, असेही काही ‘व्हिजन’ बघा. नशिबाने रुग्णवाहिका मिळालीच तर तिचा चालक आदिवासी मातेला नवजात शिशूसह मध्येच न उतरवता घरापर्यंत पोहोचवेल, असे काही करा. बाकी तुमच्या त्या विकासाच्या व्हिजनच्या बाता काय सुरूच राहणार आहेत, अशा शब्दात ठाकरेंच्या शिवसेनेचे मुखपत्र असलेल्या सामनातून महायुती सरकार आणि मुख्यमंत्री देवेंद्र फडणवीस यांच्यावर हल्लाबोल केला आहे.

ठाण्यातील भाईंदर पाडा येथील एका इमारतीच्या पार्किंगमध्ये आग लागल्याची घटना समोर आली आहे. पहाटेच्या सुमारास लागलेल्या या आगीत पार्किंगमधील 3 दुचाकी जळून खाक झाल्या आहेत.

महायुती सरकारने कोट्यवधी रुपयांचा निधी दिला. या निधीतून जिल्ह्याचा विकास करण्याऐवजी भावनिक आव्हान केलं जातं. अतिवृष्टीतील कामाचे रिल्स मोबाईलमध्ये सोडले जातात, तर दुसरा समाजमाध्यमांवर स्वतःच स्वतःची पाठ थोपटून घेतो, असं म्हणत धाराशिवचे पालकमंत्री तथा परिवहनमंत्री प्रताप सरनाईक यांनी खासदार ओमराजे निंबाळकर आणि आमदार राणाजगजितसिंह पाटील यांच्यावर टीका केली.

पुण्यात MPSC ची तयारी करणाऱ्या एका विद्यार्थ्यांने आत्महत्या केल्याची घटना समोर आली आहे. गळफास घेऊन ही आत्महत्या केल्याचे उघड झालं आहे. सागर पवार (26) असं आत्महत्या केलेल्या विद्यार्थ्याचं नाव आहे.

इथे येऊन कोण म्हणते तिजोरी आमच्याकडे आहे तर कोण म्हणतंय चावी आमच्याकडे आहे. पण बँकच आमच्याकडे आहे. मग तिजोरी आणि चावी कुठून आणणार असं म्हणत पालकमंत्री जयकुमार गोरे यांनी अजित पवारांच्या राष्ट्रवादीला टोला लगावला.