हिंमत असेल तर…समोर या; दानवेंचा गायकवाडांना इशारा

औरंगाबाद : बुलढाण्यात शनिवारी शिंदेगट आणि शिवसेना कार्यकर्त्यांमध्ये तुफान राडा झाला होता. या राड्यानंतर शिंदे गटातील आमदार संजय गायकवाड (Sanjay Gaikwad) यांनी वादग्रस्त विधान केले होते. पुन्हा राडा केल्यास 'चून चून के मारे जाएंगे' असा इशारा गायकवाड यांनी शिवसैनिकांना दिला होता. या इशाऱ्याला विधान परिषदेचे विरोधी पक्षनेते आणि शिवसेना नेते अंबादास दानवे (Ambadas Danve) यांनी प्रत्युत्तर दिले आहे.

दानवे म्हणाले, शिवसैनिकांना शोधून मारणारा अजून जन्माला यायचा आहे. हिंमत असेल तर भ्याडपणाने बोलण्यापेक्षा समोर या, असे जाहिर आव्हान त्यांनी गायकवाड यांना दिले आहे. गायकवाड यांच्यात हिंमत असेल तर भ्याडपणाने बोलण्यापेक्षा समोर यावे. मग कळेल कोण चून चून के मारेल व कोण गिन गिन के मारेल, असे दानवे म्हणाले.

शनिवारी बुलढाण्यात शिवसेनेच्या नवनियुक्त पदाधिकाऱ्यांच्या सत्काराचे आयोजन करण्यात आले होते. यावेळी शिंदे गटातील काही कार्यकर्ते गायकवाड यांच्या कार्यक्रमस्थळी प्रवेश करत आम्हीच शिवसेना असा दावा करत गोंधळ घातल होते. यामुळे दोन्ही गटातील कार्यकर्ते एकमेकांत भिडले.

या राड्यानंतर शिंदे गटातील आमदार गायकवाड यांनी वादग्रस्त विधान केले होते. पुन्हा राडा केल्यास 'चून चून के मारे जाएंगे' असा धमकीवजा इशारा गायकवाड यांनी शिवसैनिकांना दिला होता. ज्या लोकांना प्रेमाची भाषा कळत नाही, त्यांच्यासाठी अशीच भाषा वापरणार, असेही गायकवाड यांनी सांगितले होते.