Ashok Chavan : तांबे प्रकरणाची माहिती थोरातांना असेल, त्यांच्या घरातला विषय आहे..

Marathwada : नाशिक पदवीधर मतदारसंघात काॅंग्रेसच्या उमेदवारीवरून जो काही प्रकार घडला तो योग्य नव्हता. आमच्या प्रदेशाध्यक्षांनी जर तांबेंना कोरे एबी फाॅर्म दिले होते, तर किमान दोघांपैकी एकाने तरी अर्ज भरायला हवा होता. पण या विषयावर मी अधिक बोलू शकणार नाही. बाळासाहेब थोरातांना या संदर्भात अधिक माहिती असू शकेल, त्यांच्या घरातलाच हा विषय असल्याचे (Congress) काॅंग्रेस नेते माजी मुख्यमंत्री अशोक चव्हाण यांनी म्हटले आहे.

औरंगाबादेत प्रसार माध्यमांशी बोलतांना त्यांनी नाशिक पदवीधर मतदारसंघातील उमेदवारीवरून झालेल्या गोंधळावर भाष्य केले. (Satyajit Tambe) सत्यजीत तांबे किंवा त्यांचे वडील यापैकी एकाने कुणीतरी एबी फाॅर्म घेवून उमेदवारी अर्ज दाखल केला असता तरी चालले असते. (Ashok Chavan) आमच्या प्रदेशाध्यक्षांनी तांबे यांना कोरे एबी फाॅर्म दिल्याचे जाहीर सांगितले आहे.

असे असतांना हा प्रकार कसा घडला? याबाबत आता प्रदेश आणि अखिल भारतीय काॅंग्रेस कमिटी योग्य तो निर्णय घेईल. बाळासाहेब थोरात यांना या संदर्भात अधिक माहिती असू शकेल, कारण त्यांच्या घरातला विषय आहे, असेही चव्हाण म्हणाले.

या सगळ्या नाट्यानंतर आता शुभांगी पाटील या मातोश्रीवर उद्धव ठाकरे यांच्याकडे पाठिंबा मागायला गेल्या असून शिवसेना त्यांना पाठिंबा देण्याच्या तयारीत आहे. यावर महाविकास आघाडीतील तीन्ही पक्ष मिळून या संदर्भात निर्णय घेतील असेही चव्हाण यांनी स्पष्ट केले.