Assembly Session : बसून बोलू नका, बाहेर लाॅबीत जा, सोळंकेंनी भाजपच्या शेलारांना झापले..

औरंगाबाद : माजलगांव मतदारसंघाचे राष्ट्रवादीचे आमदार प्रकाश सोळंके हे आपल्या बेधडक स्वभावासाठी ओळखले जातात. विधानसभेच्या अर्थसंकल्पीय अधिवेशनात काल त्यांनी बीड (Ncp) जिल्ह्यातील कायदा व सुव्यवस्थेवर बोट ठेवत धडाकेबाज भाषण करत परिस्थिती मांडली. विशेष म्हणजे ते सत्ताधारी पक्षाचे आमदार असून देखील ते हातचे राखून बोलले नाही. (Mla Prakash Solanke) परिणामी गृहमंत्री दिलीप वळसे पाटील यांना त्यांनी केलेल्या आरोपांची आणि मुद्यांची तातडीने दखल घ्यावी लागली आणि बीडच्या पोलीस अधिक्षकांना सक्तीच्या रजेवर पाठवण्याचा निर्णय घ्यावा लागला. (Marathwada)

हे सगंळ सांगण्याचे कारण म्हणजे आज दुसऱ्या दिवशी त्यांच्या आक्रमक स्वभावाचा फटका आणि अनुभव भाजपचे आमदार आशिष शेलार यांना आला. त्याचे झाले असे की, राष्ट्रीयकृत बॅंकाकडून जिल्ह्यामंध्ये शेतकऱ्यांना जे कर्जवाटप केले जाते, त्यात मोठ्या प्रमाणात भ्रष्टाचार होत असल्याचा मुद्दा सोळंके यांनी सभागृहात उपस्थित केला. पैसे देऊन दलालामार्फत फाईल करणाऱ्यांचे काम दहा मिनिटात होते, मात्र सर्वसामान्यांच्या कर्जाच्या फायली मात्र मंजुर होत नाही, असा आरोप सोळंके यांनी केला.

यावर भाजपचे आमदार आशिष शेलार यांनी जागेवर बसूनच अडथळा आणला, त्यामुळे सोळंके चांगले संतापले. `अहो शेलार साहेब मी राष्ट्रीयकृत बॅंकेच्या भ्रष्टाचाराबद्दल बोलतो आहे, तुम्ही वेगळंच म्हणतायं, शिवाय खाली बसून बोलू नका. मी बोलत असतांना अडथळा निर्माण करू नका. बोलायचेच असेल तर बाहेर लाॅबी आहे, तिथे जाऊन गप्पा मारा, अशा शब्दात सुनावले.

सोळंके यांचा हा आक्रमक पावित्रा पाहिल्यानंतर शेलार गप्प बसले आणि मग सोळंकेने पुढे भाषण सुरू केले. प्रकाश सोळंके हे विधानसभेतील वरिष्ठ सदस्य आहेत. ते सातत्याने आपल्या मतदारसंघातून निवडून येतात. बीड जिल्हा राष्ट्रवादी काॅंग्रेसमध्ये सर्वात अनुभवी आणि ज्येष्ठ नेते म्हणून त्यांचा पक्षात दरारा आहे.

आजही जिल्ह्यात त्यांच्या शब्द प्रमाण मानला जातो. त्यामुळे आज भाषणात अडथळा निर्माण करणाऱ्या विरोधी पक्षाच्या आमदारांनी त्यांनी कडक शब्दात सुनावले, त्यांच्या या झापाझापीची चर्चा राजकीय वर्तुळात होत आहे.