Aurangabad : बागडेंना गावातच धोबीपछाड, सोसायटी निवडणुकीत फक्त १ जागा

औरंगाबाद : भाजपचे जिल्ह्यातील जेष्ठ नेते, माजी विधानसभा अध्यक्ष आणि विद्यमान आमदार हरिभाऊ बागडे (Haribhau Bagde) (नाना) यांना त्यांच्याच गावातील विविध कार्यकारी सोसायटी निवडणुकीत सपाटून मार खावा लागला. गेल्या तीस वर्षापासून असलेली सत्ता बागडे यांच्या हातून गेली आहे. (Bjp) विविध कार्यकारी सोसायटीच्या काल झालेल्या निवडणुकीत महाविकास आघाडीच्या पॅनलने १३ पैकी तब्बल १२ जागा जिंकल्या. तर बागडे यांच्या पॅनलमधील फक्त एक उमेदवार विजयी झाला आहे.

बागडे यांच्या नेतृत्वाखालील पॅनलला गावातच विरोधकांनी धुळ चारल्यामुळे हा मोठा धक्का समजला जात आहे. (Aurangabad) औरंगाबाद तालुक्यातील चितेपिंपळगाव येथील विविध कार्यकारी सहकारी संस्था सोसायटीची निवडणुक पार पडली. या निवडणुकीत बागडेंच्या पॅनल विरोधातील महाविकास आघाडीच्या पॅनलचे उमेदवार मोठ्या संख्येने विजयी झाले. बागडेंच्या पॅनला मात्र फक्त एकच जागा जिंकता आली.

विशेष म्हणजे गेली ३० वर्ष या सोसायटीवर बागडे नानांची मजबुत पकड होती. त्यामुळे असे कसे झाले? याची चर्चा गावात सुरू झाली आहे. काँग्रेसचे नेते व माजी आमदार रामभाऊ अप्पा गावंडे यांचे पुत्र शामराव गावंडे तसेच राष्ट्रवादी काँग्रेसचे तालुका अध्यक्ष शिवाजी गावंडे यांच्या शिवशक्ती शेतकीर पॅनललचे १३ पैकी १२ उमेदवारांनी दणदणीत विजय मिळवला. तर हरिभाऊ बागडे यांच्या पॅनलमधील फक्त एका उमेदवाराला विजय मिळवता आला.

बागडे हे जिल्ह्यातील भाजपचे ज्येष्ठ नेते आहेत, अगदी राष्ट्रीय स्वयंसेवक संघाच्या काळापासून चितेपिंपळगावातील सगळ्या सहकारी संस्थावर बागडे नाना यांचे एकहाती वर्चस्व राहिले आहे. आमदार, विधानसभा अध्यक्ष आणि आता पुन्हा आमदार असा मोठा राजकीय अनुभव गाठीशी असतांना बागडेंवर गावातच अशी नामुष्की ओढावल्याबद्दल आश्चर्य व्यक्त होत आहे.