Aurangabad : परदेशी पाहुण्यांसमोर शोभा नको, पर्यटन स्थळाजवळील अतिक्रमणे हटवा..

G-20 Conference News : दौलताबाद किल्ला परिसरातील अतिक्रमण संबंधितांनी ३१ डिसेंबर पर्यंत स्वतः हून काढून घ्यावीत, नसता त्यांच्यावर कठोर कारवाई करण्याचे निर्देश जिल्हाधिकारी आस्तिक कुमार पाण्डेय यांनी दिले. जी-२० परिषदेच्या अनुषंगाने (Collector) जिल्हाधिकारी आस्तिक कुमार पाण्डेय, मनपा आयुक्त डॉ. अभिजीत चौधरी, पोलीस अधीक्षक मनीष कलवानिया यांनी परिसरातील अतिक्रमणाची पाहणी केली.

तसेच या परिसरातील अतिक्रमण काढण्याचे आदेश संबंधित यंत्रणांना दिले. (Marathwada) वेरूळ लेणी परिसरातील अतिक्रमण काढून त्यांना पर्यायी जागा देण्याबाबत नियोजन करावे, येथील एमटीडीसीच्या मालकीच्या असणाऱ्या पार्किंगमध्ये वाहने लावण्याचे नियोजन करण्याचे निर्देशही जिल्हाधिकारी यांनी दिले.

यावेळी वेरूळ येथून जाणाऱ्या बायपासच्य जागेची पाहणी करून स्थानिक नागरिकांशी संवाद साधण्यात आला. जी-२० शिखर परिषदेचे सहभागी प्रतिनिधी ९ व १० फेब्रुवारी २०२३ आणि २२ व २३ मे, रोजी औरंगाबाद (Aurangabad) शहराला भेट देणार आहेत.

वेरुळ, अजिंठा लेण्यांसह विविध पर्यटन स्थळांना देखील ते भेट देणार आहेत. भारत, इटली व इंडोनशिया हे तीन देश जी-२० परिषदेचे आयोजन करत असून औरंगाबाद येथे जगभरातील ४० देशातून सुमारे ५०० प्रतिनिधी भेट देणार आहेत. या पार्श्वभूमीवर प्रशासन जोरदार तयारीला लागले आहे.