Shaktipeeth highway survey opposition : ''लाडकी'चे दीड हजार वापस घ्या, पण...'; 'शक्तिपीठ'साठी एक इंच जमीन देणार नसल्याचा शेतकऱ्यांचा इशारा

Beed Ambajogai highway protest : मुख्यमंत्री देवेंद्र फडणवीस यांचा शक्तिपीठ महामार्ग हा महत्त्वाकांक्षी महामार्ग आहे. मात्र या शक्तिपीठाला दररोज विरोध वाढू लागला आहे.

बीड अंबाजोगाई इथं शक्तिपीठ महामार्गाच्या मोजणीसाठी आलेल्या अधिकाऱ्यांना शेतकऱ्यांनी आणि महिलांनी जमिनीची मोजदाद न करता वापस पाठवले. यावेळी महिलांनी तीव्र भावना व्यक्त करताना, जमिनी घेऊ नका, वाटल्यास लाडकी म्हणून देत असलेले, दीड हजार रुपये देऊ नका, असा टोला महायुती सरकारला लगावला.

शक्तिपीठ महामार्ग हा राज्यातील सर्वात मोठी 760 किलोमीटरचा महामार्ग असणार आहे. बीड (BEED) जिल्ह्यातून अंबाजोगाई आणि परळी इथून हा महामार्ग जात आहे. या महामार्गासाठी आवश्यक असलेल्या जमिनीच्या मोजणीसाठी अधिकारी आले होते. त्यावेळी शेतकरी आणि महिलांनी तीव्र विरोध केला.

अंबाजोगाई तालुक्यातील पिंपळा, धायगुडा, भारज, गित्ता, वरवटी गावातील शेतकऱ्यांनी (Farmer) एकत्र येत, अधिकाऱ्यांकडून जमिनीची सुरू असलेल्या मोजणीला विरोध केला. शेतकरी आणि महिलांनी एकत्र येत, 'शक्तिपीठ'साठी एक इंच देखील जमीन देणार नाही, असा इशारा अधिकाऱ्यांना दिला. जमिनीची मोजदाद देखील करून दिली नाही. अधिकाऱ्यांना शेतकरी आणि महिलांनी तेथून काढून दिले.

शेतकऱ्यांबरोबर महिलांनी शक्तिपीठ महामार्गाविरोधात यावेळी जोरदार घोषणाबाजी केली. महिलांनी महायुती सरकारला विनंती करताना, सरकारनं लाडक्या बहिणीच्या जमिनी घेऊ नये, वाटल्यास लाडकी म्हणून देत असलेले दीड हजार रुपये वापर घ्यावेत. पण आमच्या जमिनी घेऊन नये. जमिनी घेतल्या आम्ही काय खायचं? असा सवाल केला.

अंबाजोगाई इथं शेतकरी आणि महिलांनी घेतलेल्या भूमिकेला शेतकरी कामगार पक्षाने पाठिंबा दिला. शेतकऱ्यांच्या बाजूने आक्रमक भूमिका घेऊ,, आम्ही शेतकऱ्यांच्या सोबत आहोत. वेळ पडली, तर आम्ही आंदोलन करू, असा इशारा दिला. नागपूर ते गोवा जाणाऱ्या या शक्तिपीठ महामार्गाला आता राज्यभरातील अनेक ठिकाणींहून विरोध होत आहे. कोल्हापूरमध्ये पहिल्यापासून या महामार्गाविरोधात शेतकरी आणि काँग्रेसने आक्रमक भूमिका घेत विरोध सुरू ठेवला आहे.