Sandip kshirsagar News: संदीप क्षीरसागर अखेर मनातलं बोलले; दोन्ही राष्ट्रवादी एकत्र आल्या तर ताकद वाढेल!

Beed Political News : अजित पवार यांच्या बीड दौऱ्याची चर्चा अजूनही सुरू आहे. विकासकामांचे लोकार्पण, उद्घाटन, भुमीपूजन करतांनाच अजितदादांनी बीडच्या राजकारणात अनेक डाव टाकले. राष्ट्रवादी काँग्रेस शरदचंद्र पवार पक्षाचे खासदार बजरंग सोनवणे यांना आपल्या हेलीकाॅप्टरमधून दिलेली लिफ्ट आणि काल बीडचे आमदार संदीप क्षीरसागर यांची पुण्यात झालेली भेट या दोन घटनांमुळे अनेकांच्या भुवया उंचावल्या आहेत.

बीड जिल्हा परिषद निवडणुकीच्या पार्श्वभूमीवर घडणाऱ्या या घडामोडी महत्वाच्या मानल्या जात आहेत. पुण्यात अजित पवारांची भेट घेतल्यानंतर आमदार संदीप क्षीरसागर अखेल मनातंल बोलूनच गेले. पिंपरी-चिंचवड महापालिका निवडणुकीत अजित पवारांची आणि शरद पवार यांची अशा दोन्ही राष्ट्रवादी काँग्रेस एकत्र आल्या आहेत. बीड जिल्हा परिषदेत असाच प्रयोग होईल का? असा प्रश्न क्षीरसागर यांना विचारण्यात आला.

यावर त्यांनी आम्ही नेहमीच दोन्ही पवारांना मानत आलो आहोत. त्यामुळे हे दोन पक्ष एकत्र येतील की नाही? यावर बोलण्या इतका मी मोठा नाही. पण दोन्ही राष्ट्रवादी एकत्र आल्या तर निश्चितच जिल्हा परिषद निवडणुकीत आमची ताकद वाढेल, असे क्षीरसागर म्हणाले.

बीडच्या कार्यक्रमात अजित पवारांनी शहराला दोन दिवसाआड पाणी देण्यासंदर्भात आश्वासन दिले. त्याच विषयासंदर्भातील काही तांत्रिक बाबी त्यांच्या कानावर घालण्यासाठी मी ते पुण्यात आहेत म्हणून वेळ मागितली होती. भेटायला वेळ मिळाल्याने मी त्यांना भेटलो आणि पाण्याच्या विषयावरच त्यांच्याशी बोललो, असे संदीप क्षीरसागर यांनी स्पष्ट केले.

नुकत्याच झालेल्या बीड नगरपालिका निवडणुकीत राष्ट्रवादी काँग्रेस पक्षाचा नगराध्यक्ष आणि सर्वाधिक नगरसेवकांसह सत्ता आली. आमदार संदीप क्षीरसागर यांच्या नेतृत्वाखाली राष्ट्रवादी काँग्रेस शरदचंद्र पवार पक्षानेही चांगले यश मिळवले. जिल्हा परिषद निवडणुकीची तयारी राष्ट्रवादी पक्षाने सुरू केली आहे. अशावेळी राष्ट्रवादी काँग्रेस शरदचंद्र पवार पक्षाचे खासदार बजरंग सोनवणे, आमदार संदीप क्षीरसागर यांची अजित पवारांशी वाढती जवळीकता भविष्यात दोन्ही पक्ष एकत्र येण्यात होणार का? याकडे संपूर्ण जिल्ह्याचे लक्ष लागले आहे.