Latur DCC Bank : सहकार मंत्री पाटील यांना पळवून नेण्याचा डाव, अमित देशमुख यांचा भाजपवर खळबळजनक आरोप!

Latur Bank News : लातूर जिल्हा मध्यवर्ती सहकारी बँकेच्या निवडणुकीदरम्यान सहकार मंत्री बाबासाहेब पाटील यांनाच पळवून नेण्याचा विरोधकांचा आराखडा होता, असा खळबळजनक दावा आमदार अमित देशमुख यांनी करत भाजपवर निशाणा साधला.

लातूर जिल्हा बँकेचा कारभार सुरळित चालू असताना तिथे नाक खुपसण्याचे काम विरोधकांकडून केले जात आहे. अशांना लातूरकरच सडेतोड उत्तर देतील. गेल्या पाच वर्षांत राज्यातील भाजप सरकारने १३ पुरस्कार लातूर जिल्हा बँकेला दिले. किमान त्याचीतरी जाण ठेवून निवडणूकीपासून दूर रहायला हवे होते, अशा शब्दांत आमदार अमित देशमुख यांनी आमदार संभाजी पाटील-निलंगेकर यांच्यावर टिकास्त्र सोडले.

लातूर जिल्हा मध्यवर्ती सहकारी बँकेच्या सहकार पॅनेलची गुरूवारी बैठक आयोजित करण्यात आली होती. सहकारात चांगले चालले असेल तर तिथे लुडबुड करायची नाही, आडवाआडवी करायची नाही, हे सूत्र आजवरील जिल्ह्यातील सर्व नेत्यांनी पाळले. जिल्हा बँकेत सध्या सगळे चांगले चालले असताना विरोधकांकडून नको तो खटाटोप केला जात आहे.

जिल्ह्यात दुष्काळाची स्थिती आहे. शेतकरी अडचणीत आहेत. येणाऱ्या काही दिवसांत पाणी टंचाईची तिवृता आणखी वाढणार आहे. त्यामुळे या प्रश्नांकडे राज्यात सत्ता असलेल्या आमदारांनी लक्ष द्यायला हवे. पण, त्याकडे दुर्लक्ष करीत सहकारात आडवाआडवी केली जात आहे, असे देशमुख म्हणाले.

गोकुळमध्ये घडले ते बँकेत घडेल...

हा सगळा खटाटोप आपल्या मालकाला खूश करण्यासाठी आणि मालक काहीतरी बक्षीस देईल, या आशेने हे सुरू आहे, अशी टीकाही त्यांनी केली. ‘गोकूळ’मध्ये जे घडले ते याही निवडणूकीत घडू शकते. त्यामुळे सजग रहा, असे आवाहनही त्यांनी यावेळी केले.

हो, आम्ही चेहरा पाहून कर्ज देतो

'चेहरा पाहून आम्ही कर्ज देतो', असा आरोप विरोधकांकडून आमच्यावर केला जात आहे. हे खरंच आहे. आम्ही चेहरा पाहून कर्ज देतो. हा चेहरा शेतकऱ्यांचा, सर्वसामान्यांचा आहे. गरजू लोकांचा आहे. कर्ज देणे हे आमचे कर्तव्यच आहे. ते आम्ही पार पाडत आहोत.

विशेष म्हणजे आजवर कधीही सक्तीने कर्जवसुली केलेली नाही. एखाद्याचे कर्ज थकले आहे म्हणून त्याच्या दारात जाऊन आमचे कर्मचारी थांबले आहेत, असे कधीही घडले नाही, असे धीरज देशमुख यांनी सांगितले.