CM Devendra Fadnavis : आयोगाच्या निवडणूक स्थगिती निर्णयावर देवेंद्र फडणवीसांची तीव्र नाराजी; म्हणाले,'ही मोठी..!'

Chhatrapati sambhajinagar : स्थानिक स्वराज्य संस्था निवडणुकांचा प्रचार आज रात्री थांबणार आहे. दरम्यान काल राज्य निवडणूक आयोगाने राज्यातील 16 नगरपालिकांच्या निवडणुका पुढे ढकलण्याचा निर्णय घेतला. मराठवाडा, पश्चिम महाराष्ट्र, खानदेश, विदर्भ अशा सगळ्याच भागातील काही नगरपालिका आणि काही जिल्ह्यातील नगरपालिकांच्या प्रभागांचा यात समावेश आहे. निवडणूक आयोगाच्या या निर्णयावर राज्याचे मुख्यमंत्री देवेंद्र फडणवीस यांनी तीव्र शब्दात नाराजी व्यक्त केली आहे.

छत्रपती संभाजीनगर येथे निवडणूक प्रचार सभेसाठी चिकलठाणा विमानतळावर दाखल झालेल्या मुख्यमंत्र्यांनी माध्यमांशी बोलताना निवडणूक आयोगाच्या निर्णयावर स्पष्ट भूमिका मांडली. मला जे कायद्याचे ज्ञान आहे त्यानुसार निवडणुका रद्द करता येत नाहीत. निवडणूक आयोग नेमका कुठला कायदा राबवत आहे? या निर्णयाने ज्या पदाधिकारी, कार्यकर्त्यांनी इतके दिवस प्रचार केला, तयारी केली त्यांच्यावर हा अन्याय होणार आहे. कुणीतरी न्यायालयात जातो आणि त्यावर निकाल दिल्यानंतर निवडणूक आयोग संपूर्ण प्रक्रियाच त्या नगरपरिषद किंवा त्या प्रभागाची रद्द करते हे अत्यंत चुकीचे आहे.

सर्वच राजकीय पक्षांच्या पदाधिकार्‍यांमध्ये निवडणूक आयोगाच्या या निर्णयामुळे नाराजीचे वातावरण आहे. कालच निलंग्याचे आमदार संभाजी पाटील निलंगेकर यांच्याशी माझे बोलणे झाले. त्यांनी हा निर्णय कसा अन्यायकारक आहे याबाबत चर्चा केली. निलंग्याप्रमाणेच मराठवाड्यासह राज्यातील अनेक नगरपालिकांमध्ये असे चित्र आहे.

उमेदवारांना प्रचारासाठी पुरेसा वेळ मिळाला असताना आता पुन्हा निवडणूक पुढे ढकलने हा त्या नगरपालिका, नगरपंचायती मधील इतर उमेदवारांवर अन्याय ठरणार आहे. राज्य निवडणूक आयोगाने निर्णय घेतला आहे, आता उद्या प्रत्यक्ष मतदान होणार असल्यामुळे तातडीने यावर काहीही करता येणार नसले तरी आम्ही निवडणूक आयोगासमोर या संदर्भात लेखी निवेदनासह प्रेझेंटेशन देणार, आहोत असे देवेंद्र फडणवीस यांनी सांगितले.

मराठवाड्यातील रेनापुर, मुखेड, धर्माबाद, वसमत आणि फुलंब्री या नगरपालिकांची निवडणूक पुढे ढकलण्यात आली असून या ठिकाणी आता वीस डिसेंबरला मतदान आणि 21 रोजी निकाल असा सुधारित निवडणूक कार्यक्रम राज्य निवडणूक आयोगाने जाहीर केला आहे. याशिवाय धाराशिव जिल्ह्यातील उदगीरमध्ये तीन जागांसाठी,अंबाजोगाई पालिकेतील चार, परळी पाच, धारूर 10 अ, बीड पालिका प्रभाग तीन ब, पूर्ण प्रभाग एक व दहा ब, भोकरदनमध्ये प्रभाग एक अ, प्रभाग 9 व गंगापूर मधील दोन जागा, पैठणमध्ये चार तर वैजापूर मधील दोन जागांची निवडणूक प्रक्रिया स्थगित करण्यात आली आहे. आता या नगरपालिका मधील प्रभागांसाठी 20 रोजी मतदान होणार आहे.

निवडणूक आयोग स्वायत्त असले तरी ते कोणाच्या सल्ल्याने निर्णय घेतात हे मला सांगता येणार नाही परंतु माझा जो काही कायद्याचा अभ्यास आहे आणि मी वकिलांशी जी चर्चा केली त्यानुसार निवडणुका रद्द करण्याचा राज्य निवडणूक आयोगाचा निर्णय अत्यंत चुकीचा असल्याचे स्पष्ट मत फडणवीसांनी व्यक्त केले.