वंचित आक्रमक; आंबेडकरांवरील टीका शिवसेनेच्या बांगरांना भोवणार?

जालना : गेल्या निवडणुकीत प्रकाश आंबेडकर (Prakash Ambedkar) यांनी एक हजार कोटी रुपये घेतल्याचा गंभीर आरोप शिवसेनेचे (shivsena) आमदार संतोष बांगर (Santosh Bangar) यांनी केला होता. त्यावरुन आता वंचित बहूजन आघाडी (Vanchit Bahujan Aghadi) आक्रमक झाली आहे. वंचितच्या वतीने बांगर यांचा पुतळ्याला जोडेमारो आंदोलन करण्यात आले आहे.

वंचितचे अमरावतीचे अध्यक्ष शैलेश गवई यांच्या नेतृत्वाखाली जिल्हाधिकारी कार्यालयावर आंदोलन करण्यात आले, या वेळी संतोष बांगर यांच्या विरोधात घोषणाबाजी करत त्यांचा पुतळा जाळण्यात आला. बांगर यांनी प्रकाश आंबेडकर यांची माफी मागावी, अन्यथा राज्यभर आंदोलन करु, असा इशाराही यावेळी वंचितने दिला.

त्याच बरोबर जालन्यातही आंदोलन करण्यात आले. बांगर यांनी जालन्यात येऊन दाखवावे, असा इशारा जालन्याचे वंचितचे अध्यक्ष घुमारे यांनी दिली. वंचितबद्दल अपशब्द वापरणाऱ्या बांगर यांना फाडून खाऊ, असेही ते म्हणाले. स्थानिक शिवसेनेवर देखील त्यांनी टीका केली. शिवसेनेत दम असेल तर लोकशाही मार्गांने वंचितशी लढून दाखवावे, असेही घुमारे म्हणाले. त्याच बरोबर बांगर यांच्या विरोधात कदीम जालना पोलीस स्टेशनमध्ये तक्रार देण्यात आल्याची माहिती घुमारे यांनी दिली.

दरम्यान, एमआयएमच्या (MIM) महाविकास आघाडीच्या प्रस्तावावरून बांगरांनी प्रकाश आंबेडकरांवर टीका केली होती. वंचित ही भाजपची बी टीम असून प्रकाश आंबडेकर यांनी गेल्या निवडणुकीत एक हजार कोटी रुपये घेतले. तसेच, गेल्या निवडणुकीत प्रचारासाठी त्यांनी हेलिकॉप्टरने प्रवास करत सभा घेतल्या. कुठून हे हेलिकॉप्टर आले हे सुद्धा लोकांना सांगावे लागणार आहे. असेही बांगर म्हणाले होते. भाजपने मत विभाजित करण्यासाठी एमआयएमला पुढे केले. गेल्या निवडणुकीत प्रकाश आंबेडकरांच्या वंचितचाही त्यासाठीच वापर केला गेला. त्यासाठी एक हजार कोटी रुपये दिल्याचा गौप्यस्फोट बांगरांनी यावेळी केला.