Marathwada News : वर्षभरापूर्वी परभणी शहरातील एका चौकात असलेल्या संविधानाच्या प्रतिकृतीची विटंबना करण्यात आली होती. या घटनेचे पडसाद राज्यभरात उमटले होते. विटंबना करणारा व्यक्ती हा मनोरुग्ण असल्याचे सांगितले गेले. पोलिसांनी दत्ता सोपन पवार या आरोपीला अटक केली होती. गेल्या तेरा महिन्यापासून तो तुरुंगात होता.
दोन-तीन दिवसांपूर्वी जामीनावर सुटका झाल्यानंतर आज (सोमवार) दत्ता पवार याने गळफास घेत आत्महत्या केल्याचे उघडकीस आले.
10 डिसेंबर 2024 रोजी परभणी शहरातील चौकात काचेच्या पेटीत असलेल्या डाॅ. बाबासाहेब आंबेडकरांनी लिहिलेल्या संविधानाच्या प्रतिकृतीची विटंबना करण्यात आली होती. सायंकाळी साडेपाच वाजताच्या सुमारास हा प्रकार समोर आल्यानंतर परभणीमध्ये मोठ्या प्रमाणात हिंसाचार उसळला होता.
जाळपोळ, दगडफेक, रास्ता रोको, बंदची हाक आणि जिल्हाधिकारी कार्यालयात घुसत आंदोलकांनी संताप व्यक्त करत आरोपीच्या अटकेची मागणी केली होती. दरम्यान, पोलिसांनी आरोपी दत्ता सोपान पवार याला अटक केली होती. गेल्या तेरा महिन्यांपासून तो तुरुंगात होता.
चार दिवसांपूर्वीच त्याला कोर्टाने जामीन मंजूर केला होता. आज दत्ता पवार याने आपल्या मिर्झापूर गावातील शेतातील खोलीत गळफास घेऊन आत्महत्या केली. तुरुंगातून बाहेर आल्यानंतर तो तणावात होता, अशी चर्चा गावात होती. अशातच आज सकाळी शेतातील खोलीमध्ये त्याने आत्महत्या केल्याने एकच खळबळ उडाली. ही घटना कळताच पोलीसांनी मिर्जापूरमध्ये धाव घेतली. दत्ता सोपान पवार याची पत्नी आणि दोन मुले हे पुणे येथे राहतात, तर त्याचे इतर नातेवाईक परभणी जिल्ह्यात वास्तव्यास आहेत.
परभणीतील संविधान शिल्प विटंबना प्रकरणातील आरोपी हा मनोरुग्ण असल्याचे सांगितले जात होते. या आरोपीला स्किझोफ्रेनिया हा मानसिक आजार असल्याची माहिती समोर आली होती. त्याच्यावर अकोल्यातील केळकर हॉस्पिटल या मानसोपचार रुग्णालयात उपचार सुरू आहेत, अशी माहिती त्याच्या कुटुंबियांनी तेव्हा दिली होती. तो सप्टेंबर आणि नोव्हेंबर असे दोन महिने व्यसनमुक्ती केंद्रात भरती होता. या मनोरुग्ण आरोपीने परभणीत संविधान शिल्पाची विटंबना केल्यानंतर राज्यभरात आंदोलन पेटलं होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.