Maharashtra Congress : `त्या` आमदारांवर कारवाई करण्यास काँग्रेस धजावेना..

Congress Political News : विधान परिषदेच्या निवडणुकीत पक्षाचा आदेश डावलून क्राॅस व्होटिंग करणाऱ्या काँग्रेसच्या सात आमदारांवर अद्याप कारवाई झालेली नाही. मराठवाडा, मुंबई व पश्चिम महाराष्ट्रातील विधान परिषद निवडणुकीत गद्दारी करणाऱ्या या आमदारांची यादी महाराष्ट्र प्रदेश काँग्रेसने दिल्लीत हायकमांडकडे पुढील कारवाईसाठी पाठवली होती. परंतु बारा दिवस उलटून गेल्यानंतरही या सात आमदारांवर कुठलीच कारवाई झालेली नाही.

आगामी विधानसभा निवडणुका लक्षात घेता या आमदारांवर कारवाई करण्यास (Congress) काँग्रेसचे वरिष्ठ नेते धजावत नाहीयेत का? असा प्रश्न या निमित्ताने उपस्थित केला जात आहे. 12 जुलै रोजी महाराष्ट्रातील विधान परिषदेतील 11 उमेदवारांसाठी निवडणूक प्रक्रिया पार पडली होती. या निवडणुकीत महाविकास आघाडीची मते फुटल्याची चर्चा मोठ्या प्रमाणात झाली होती.

विशेषतः काँग्रेसच्या सात उमेदवारांनी पक्षाचा आदेश झुगारत महायुतीच्या उमेदवाराना मदत केल्याचा त्यांच्यावर आरोप होता. जालन्याचे काँग्रेस आमदार कैलास गोरंट्याल यांनी सर्वप्रथम काही आमदारांची नावे राज्यातील प्रमुख नेत्याना सांगत क्राॅस व्होटिंग झाल्याचे निदर्शनास आणून दिले होते. पुरावे आणि खात्री पटल्यानंतर गद्दारी केलेल्या या आमदारांची नावासह यादी तयार करुन ती दिल्लीला हायकमांडकडे कारवाईसाठी पाठवण्यात आली होती.

विधान सभेचे विरोधी पक्षनेते विजय वड्डेटीवार, काँग्रसचे प्रदेशाध्यक्ष नाना पटोले (Nana Patole) यांनी हे प्रकरण गांभीर्याने घेत कुठल्याही परिस्थितीत गद्दारी करणाऱ्या आमदारांना सोडणार नाही, त्यांच्यावर कारवाई केली जाईल, असे सांगितले होते. या संदर्भात 19 जुलै रोजी काँग्रेसच्या वरिष्ठ नेत्यांची बैठक होणार होती. मात्र विधान परिषदेसाठी मतदान होऊन दोन आठवडे होत आले तरी काँग्रेसकडून कुठलीच पावले उचलली गेली नाहीत.

दरम्यान, नांदेड जिल्ह्यातील काँग्रेसचे आमदार जितेश अंतापूरकर यांनी भाजपचे खासदार अशोक चव्हाण यांच्यासह काही नेत्यांची भेट घेतली होती. भाजपचे खासदार माजी केंद्रीय अर्थ राज्यमंत्री डाॅ.भागवत कराड यांनी काँग्रेसच्या कारवाईची खिल्ली उडवतांना कसली कारवाई, ते सगळे आमदार भाजपमध्ये येणार असल्याचा दावा केला होता.

आगामी विधानसभा निवडणुका पाहता काँग्रेस हायकमांड `त्या` सात आमदारांच्या बाबत मवाळ झाले आहे का? अशी चर्चा राजकीय वर्तुळात सुरू झाली आहे. एकाचवेळी सात आमदारांवर कारवाई केल्यास त्याचा पक्षावर काय परिणाम होईल? याची चाचपणी देखील पक्षाच्या वरिष्ठ नेत्यांकडून केली जात असल्याचे बोलले जाते.

विधान परिषद (Vidhan Parishad) निवडणुकीत काँग्रेसचे आमदार फुटल्याचे उघड झाल्यानंतर ज्या वेगाने राज्यातील नेत्यांनी कठोर कारवाईचे संकेत दिले होते, पण दोन आठवड्यानंतर यावर आता चर्चाही होताना दिसत नाहीयेत. दुसरीकडे उपमुख्यमंत्री देवेंद्र फडणवीस यांनी महाविकास आघाडीचे आम्ही विधान परिषदेच्या निवडणुकीत वीस आमदार फोडले, पण त्यांना कळाले सुद्धा नाही, असा टोला लगावला होता.