Dhananjay Munde News: धनंजय मुंडेंना मोठा दिलासा,परळी न्यायालयाने करुणा मुंडेंची 'ती' याचिका फेटाळली

Beed News : परळीचे आमदार धनंजय मुंडे यांनी आपल्या विधानसभा निवडणुकीतील शपथपत्रात खोटी माहिती दिल्याचा आरोप करुणा मुंडे यांनी परळीच्या प्रथम वर्ग न्यायालयात याचिकेद्वारे केला होता. आज याचिकेवर सुनावणी पार पडली. मुंडे यांची ही याचिका न्यायालयाने फेटाळली आहे. त्यामुळे धनंजय मुंडे (Dhananjay Munde) यांना दिलासा मिळाला आहे.

माजी मंत्री धनंजय मुंडे यांच्यावर गेल्या वर्षभरापासून करुणा मुंडे या वेगवेगळे आरोप करत आहेत. परळीसह मुंबई उच्च न्यायालयात त्यांनी वेगवेगळ्या विषयांवर याचिकाही दाखल केल्या आहेत. यापैकीच परळी न्यायालयात दाखल याचिकेवर आज सुनावणी झाली. माजी मंत्री धनंजय मुंडे यांच्या विरोधात विधानसभा निवडणुकीच्या निवडणुक शपथपत्रात धनंजय मुंडे यांनी खोटी माहिती दिल्याचा आरोप करुणा मुंडे यांनी केला होता. ही याचिका परळी न्यायालयाने बुधवारी (ता.31) फेटाळली.

लोकप्रतिनिधी अधिनियम कायद्याच्या अंतर्गत ऑनलाइन पद्धतीने करुणा शर्मा-मुंडे यांनी धनंजय मुंडे यांच्याविरोधात तक्रार केली होती. परळीच्या प्रथमवर्ग न्यायालयात यावर सुनावणी पार पडली. विधानसभा निवडणुकीत आमदार धनंजय मुंडे यांनी करुणा मुंडे (Karuna Munde) यांच्या नावाचा उल्लेख टाळल्याप्रकरणी शर्मा यांनी ऑनलाइन पद्धतीनं तक्रार दाखल केली होती. या तक्रारीत निवडणूक रद्द करण्याची मागणी त्यांनी केली होती.

या प्रकरणात दोन्ही बाजूचा युक्तिवाद झाल्यानंतर करुणा शर्मा-मुंडे यांची तक्रार परळी न्यायालयाने फेटाळली आहे. याआधी कृषी विभागाच्या खरेदीत धनंजय मुंडे यांनी भ्रष्टाचार केल्याचा आरोप करण्यात आला होता. त्या प्रकरणी दाखल याचिकेमध्ये कोणतेही तथ्य आढळले नसल्याचे सांगत मुंबई उच्च न्यायालयाने तक्रारदाराला दंड ठोठवला होता.

दरम्यान, मुंबई उच्च न्यायालयात करुणा मुंडे यांनी पोटगीसाठी दाखल केलेल्या दाव्यात त्यांना दिलासा मिळाला होता. परळी न्यायालयाने मात्र करुणा शर्मा-मुंडे यांची याचिका फेटाळून लावली आहे. करुणा शर्मा-मुंडे आणि धनंजय मुंडे यांच्यात गेल्या एक-दीड वर्षापासून कौटुंबिक वाद सुरू आहेत. यातून करुणा शर्मा-मुंडे यांनी धनंजय मुंडे यांच्यावर सातत्याने आरोप आणि न्यायालयात याचिका दाखल केल्या होत्या.