Imtiaz Jalil News : तुम्ही न्यायालयाला मोजले नाही, आम्ही तुम्हाला मोजत नाही ; आंदोलन सुरूच राहणार..

Aimim : औरंगाबादच्या नामांतरावरून सुरू असलेले साखळी उपोषण सुरूच राहणार असे खासदार इम्तियाज जलील यांनी ठणकावून सांगितले. राज्याचे गृहमंत्री तथा उपमुख्यमंत्री देवेंद्र फडणवीस (Devendra Fadanvis) यांनी नामांतराच्या विरोधातील आंदोलन आता थांबले पाहिजे, अशी अपेक्षा प्रसार माध्यमांशी बोलतांना व्यक्त केली होती.

त्याचा दाखला देत इम्तियाज जलील (Imtiaz Jalil) यांनी ` तुम्ही न्यायालयाचा मोजले नाही, आम्ही तुम्हाला मोजत नाही`, असे म्हणत फडणवीस यांनी आंदोलन थांबवण्याचे केलेले आवाहन धुडकावून लावले. (Aimim) इम्तियाज जलील म्हणाले, देवेंद्र फडणवीस यांचा आंदोलन थांबले पाहिजे हा बाईट मी पाहिला, आता तर हे आंदोलन सुरूच राहणार.

शहराच्या नामांतराचे प्रकरण न्यायप्रविष्ट असतांना सरकारने निर्णय घेतला कसा? तुम्ही जर न्यायालयाला मानत नसाल, त्यांची धज्जीया उडवणार असाल, तर मग आम्हीही तुम्हाला मोजत नाही. नामांतराविरोधीतील आंदोलन सुरूच राहणार असा, इशारा इम्तियाज यांनी आंदोलनस्थळी केलेल्या भाषणात दिला.

नामांतराच्या विरोधात इम्तियाज जलील यांच्या नेतृत्वाखाली जिल्हाधिकारी कार्यालयासमोर साखळी उपोषण सुरू आहे. या संदर्भात नुकतेच शहरातील उद्योजकांनी मुख्यमंत्री एकनाथ शिंदे यांना पत्र पाठवून शहराचे वातावरण खराब होवू नये, यासाठी मार्ग काढण्याची विनंती केली होती.

उपमुख्यमंत्री देवेंद्र फडणवीस यांनी देखील महाराष्ट्रात औरंगजेबाचा उदोउदो होणार नाही, छत्रपती संभाजीनगर नामांतर आता झाले आहे, त्यामुळे या विरोधात सुरू असलेले आंदोलन देखील थांबले पाहिजे, असे मत व्यक्त केले होते. यावर इम्तियाज जलील यांनी नामांतराचे प्रकरण न्यायालयात असतांना तुम्ही निर्णय कसा घेतला. न्यायालयाच्या आदेशाला तुम्ही जुमानले नाही, मग आता आम्ही देखील तुम्हाल जुमानत नाही, आंदोलन सुरूच राहील, असा आक्रमक पावित्रा घेतला.