Mahavikas Agahdi News : सभा आघाडीची, तयारी ठाकरेंच्या शिवसेनेची..

Marathwada : कसबा, चिंचवड पोटनिवडणुकीत जनतेने दिलेला कौल हा राज्यातील सत्ताधारी पक्षांच्या बाजूने नाही, तर महाविकास आघाडीच्या (Mahavikas Aghadi) बाजूने असल्याचे स्पष्ट झाले. ठाकरेंच्या शिवसेनेचे काय होणार याचा निकाल सर्वोच्च न्यायालयात पुढच्या काही दिवसांत लागणार आहे. या दोन्ही घटना पाहता महाविकास आघाडी सत्ताधाऱ्यांची कोंडी करण्यासाठी मैदानात उतरली आहे.

मुंबईत आघाडीच्या सर्व नेत्यांच्या उपस्थितीत संयुक्त बैठक झाली. आता राज्यभरात होणाऱ्या संयुक्त जाहीर सभांसाठीची तयारी सुरू झाली आहे. (Shivsena) सभा महाविकास आघाडीच्या होणार असल्या तरी यासाठी पुढाकार हा ठाकरेंच्या शिवसेनेनेच घेतलल्याचे दिसून येत आहेत. (Marathwada) मुंबईत सगळ्या पक्षांचे नेते, पदाधिकारी एकत्र आले होते, इकडे सभेच्या तयारीसाठी होत असलेल्या आढावा बैठकांसाठी मात्र ठाकरे गटाचे नेते एकटेच झटत असल्याचे चित्र आहे.

छत्रपती संभाजीगनर येथे २ एप्रिल रोजी आघाडीची संयुक्त सभा होणार आहे. मराठवाडा सांस्कृतिक मंडळाच्या मैदानावर होणारी ही सभा रेकाॅर्डब्रेक करण्यासाठी विधान परिषदेचे विरोधी पक्षनेते अंबादास दानवे, नेते चंद्रकांत खैरे, सचिव अशोक पटवर्धन यांनी दौरे सुरू केले आहेत. अर्थसंकल्पीय अधिवेशनाला शनिवार, रविवार सुटी असल्याने दानवे यांनी संपुर्ण जिल्ह्याचा दौरा करत आढावा सुरू केला आहे.

तर मराठवाडास्तरावरचा आढावा खैरे, पटवर्धन हे घेत आहे. २० मार्च रोजी सकाळी ११ वाजता बीड जिल्ह्यातील पदाधिकारी यांची आढावा बैठक तर सायंकाळी ४ वाजता लातूर जिल्ह्यातील पदाधिकाऱ्यांची बैठक होणार आहे. तर मंगळवारी २१ मार्च रोजी तुळजापूर येथे तुळजाभवानी मातेचे दर्शन व दुपारी १ वाजता धाराशिव येथे जिल्ह्यातील पदाधिकाऱ्यांची आढावा बैठक घेणार आहेत. शिवसेनेचे नेते या संयुक्त आघाडीसाठी मैदानात उतरले असले तरी राष्ट्रवादी, काॅंग्रेसच्या पातळीवर मात्र सध्या शांतता दिसत आहे.