Majalgaon APMC Election Result: आमदार सोळंकेनी माजलगावातही बाजी मारली; पुत्र वीरेंद्रचीही जोरदार एंट्री !

दत्ता देशमुख -

Beed News : जिल्ह्यातील माजलगाव, वडवणी, केज, अंबाजोगाई, परळी, बीड, गेवराई, कडा व पाटोदा या नऊ बाजार समित्यांच्या निवडणुका झाल्या आहेत. यातील ओपनिंगलाच वडवणी बाजार निवडणूकीचा निकाल जाहीर झाला आणि आमदार प्रकाश सोळंके(Prakash Solanke) यांच्या नेतृत्वाखालील महाविकास आघाडीने विजय मिळविला.

वडवणी बाजार समितीवर महाविकास आघाडी(Mahavikas Aaghadi)चे एकहाती वर्चस्व राखण्यात यश मिळवलेल्या राष्ट्रवादी आमदार प्रकाश सोळंके यांनी माजलगाव बाजार समितीच्या निवडणुकीत देखील यश मिळविले आहे. या निवडणूकीच्या माध्यमातून त्यांनी पुत्र वीरेंद्र सोळंके देखील राजकारणात आणले असून त्यांचाही विजय झाला.

महाविकास आघाडीच्या पारड्यात शनिवारी गेवराई, अंबाजोगाई व परळी बाजार समित्या निकाल आला आहे. तर केवळ केज बाजार समिती भाजपला जिंकता आली. दरम्यान, रविवारी माजलगाव आणि पाटोदा बाजार समितीच्या संचालक मंडळाच्या निवडणुकीसाठी मतदान झाल्यानंतर मतमोजणी झाली. यात माजलगाव बाजार समितीमध्ये आमदार प्रकाश सोळंके यांच्या नेतृत्वाखाली राष्ट्रवादी कॉंग्रेस प्रणित आघाडीनं 18 पैकी 12 बारा जागा जिंकल्या.

व्यापारी मतदारसंघामध्ये राष्ट्रवादी कॉंग्रेस, भाजपा यांच्या पॅनलच्या उमेदवाराच्या विरोधात माजी आमदार राधाकृष्ण होके पाटील यांनी प्रभाकर होके, जुगलकिशोर नावंदर हे दोन उमेदवार दिले होते.

या व्यापारी मतदारसंघामध्ये हे दोन्ही उमेदवार विजयी झाले असून होके पाटील यांच्या गटाचे या व्यापारी मतदारसंघावर एकतर्फी विजय मिळवत वर्चस्व राखले आहे. या निवडणूकीच्या माध्यमातून आमदार प्रकाश सोळंके यांचे पुत्र वीरेंद्र सोळंके देखील राजकारणात सक्रिय झाले. सेवा संस्था मतदारसंघातून त्यांनी विजय मिळविला.

(Edited By Deepak Kulkarni)