राष्ट्रवादीचे आमदार बाबाजानी दुर्राणी यांना कब्रस्तानात एकाने केली धक्काबुक्की

पाथरीः अत्यंविधीसाठी पाथरी शहरातील मुस्लिम स्मशानभूमीत आलेल्या राष्ट्रवादी कॉग्रेसचे जिल्हाध्यक्ष आमदार बाबाजानी दुर्राणी यांना एका इसमाने धक्काबुक्की केल्याची घटना आज दुपारी दोनच्या सुमारास घडली. या घटनेनंतर संपूर्ण पाथरी शहरात तणावाचे वातावरण पसरले असून बाजारपेठ बंद करण्यात आली.

दरम्यान, या घटनेनंतर बाबाजानी दुर्राणी यांनी मोहमंद चाऊस या व्यक्तीविरुध्द पोलिस ठाण्यात तक्रार दिल्यानंतर गुन्हा दाखल करण्यात आला आहे. पाथरी शहरातील नागरीक लालू कुरेशी यांच्या अंत्यसंस्कारासाठी बाबाजानी दुर्राणी हे दुपारी माळीवाडा परिसरातील जुम्मा मशीद कब्रस्थान येथे आले होते.

त्या ठिकाणी जिल्हा बँकेचे संचालक दत्तराव मायंदळे, बखतीयार खान व जुबेर बीन हावेल यांच्याशी ते चर्चा करत असतांना अचानक तेथे आलेल्या मोहम्मद बीन सईद बीन किलेब चाऊस याने त्यांना शिवीगाळ करत त्यांच्यावर हल्ला चढवला. दुर्राणी यांना धक्काबुक्की करत त्याने त्याना जीवे मारण्याची धमकी दिली.

अचानक घडलेल्या या प्रकारामुळे उपस्थितीतामध्ये एकच धावपळ उडाली. घटनेची माहिती पाथरी शहरात वाऱ्यासारखी पसरली त्यामुळे शहरात तणाव पसरला, व्यापाऱ्यांनी दुकाने बंद करून घेतली. दरम्यान, दुर्राणी यांनी या प्रकारानंतर पाथरी पोलिस ठाण्यात मोहंमद चाऊस यांच्या विरोधात तक्रार दिली. त्यावरून गुन्हा नोंद करण्यात आल्याची माहिती पोलिसांनी दिली.

घटनेचा तपास पोलीस उपनिरीक्षक अमोल गायकवाड हे करीत आहेत. दरम्यान, बाबाजानी यांच्यावर हल्ला करणारे मोहंमद चाऊस हे शहरातील शांतता भंग करत आहेत, त्यांच्यावर अनेक गुन्हे दाखल आहेत.

त्यामुळे मोहम्मद चाऊस यांना हद्दपार करावे, अन्यथा सोमवार २२ नोव्हेंबरपासून शहरातील सर्व व्यापारी आपली दुकाने बेमुदत बंद ठेवतील, अशा इशाऱ्याचे निवेदन व्यापारी महासंघाचे अध्यक्ष आरिफ खान यांनी तहसीलदार, यांना दिले आहे.