Santosh Deshmukh : संपूर्ण महाराष्ट्राला हादरवून सोडणाऱ्या सरपंच संतोष देशमुख हत्येप्रकरणी मोठी अपडेट!

Beed News, 11 Feb : संपूर्ण राज्याला हादरवून टाकणाऱ्या मस्साजोगचे सरपंच संतोष देशमुख (Santosh Deshmukh) यांच्या हत्या प्रकरणी आता एक मोठी अपडेट समोर आली आहे. ती म्हणजे हत्येप्रकरणी सीआयडीने न्यायलयात दोषारोप पत्र सादर केल्यानंतर या प्रकरणाची पहिली सुनावणी बुधवारी (ता.12) होणार आहे.

या सुनावणीकडे अवघ्या महाराष्ट्राचं लक्ष लागलं आहे. संतोष देशमुख (Santosh Deshmukh) यांच्या हत्येला आता जवळपास तीन महिने उलटून गेले आहेत. तरी देखील या प्रकरणातील आरोपींना शिक्षा का केली जात नाही? असा सवाल राज्यभरातून उपस्थित केला जात आहे.

दरम्यान, नुकतंच काही दिवसांपूर्वी गुन्हे अन्वेषण विभागाने (CID) कोर्टात सादर केलेल्या दोषारोप पत्रातील आरोपींनी संतोष देशमुख यांना क्रुर मारहाण केल्याचे सोशल मीडियावर व्हायरल झाले होते. हे फोटो समोर येताच राज्यभरात संतापाची लाट उसळली होती.

आरोपींना कठोरात कठोर शिक्षा करावी या मागणीसाठी विविध शहरात मोर्चे काढले जात आहेत. सर्वात धक्कादायक बाब म्हणजे या प्रकरणातील मुख्य आरोपी कृष्णा आंधळे (krishna Andhale) अद्याप फरार आहे. त्याला पकडण्यात पोलिसांना अपयश आलं आहे. अशातच आता उद्या या हत्येप्रकरणी केज जिल्हा व सत्र न्यायालयात पहिली सुनावणी होणार आहे.

या सुनावणी दरम्यान मकोका अंतर्गत कारवाई केलेले आरोपी वाल्मिक कराड (Walmik Karad), सुदर्शन घुले, सुधीर सांगळे, प्रतीक घुले, विष्णू चाटे, आणि जयराम चाटे यांचे जबाब महत्त्वपूर्ण ठरणार आहेत. या आरोपींचे जबाब बंद लिफाफ्यामधून न्यायालयात सादर केले जाणार आहेत.

शिवाय खंडणी प्रकरणातील मुख्य आरोपी आणि हत्येचा मास्टरमाईंड असलेल्या आरोपी वाल्मिक कराडच्या जामीनासाठी उद्या न्यायालयात अर्ज दाखल केली जाण्याची शक्यता वर्तवली जात आहे. त्यामुळे उद्याच्या सुनावणी दरम्यान नेमकं काय होणार? आणि न्यायालय काय निर्णय देणार? याकडे देशमुख कुटुंबियांसह संपूर्ण राज्याचं लक्ष लागून राहिलं आहे.