Ambadas Danve On Devendra Fadnavis : साताऱ्यात अंमली पदार्थाचा कारखाना, राज्याला उडता महाराष्ट्र का म्हणू नये? अंबादास दानवेंचा मुख्यमंत्र्यांना सवाल

Shivsena UBT News : गेल्या अनेक महिन्यापासून राज्याच्या विविध भागात अंमली पदार्थांची तस्करी, त्याचे सेवन अन् कारखाने असे प्रकार उघडकीस येत आहेत. तुळजापूर, लातूर, धाराशिव जिल्ह्यात एमडी ड्रग्स आणि त्यातून अनेक वाईट घटना घडल्या आहेत. यावरून विरोध पक्षांनी सत्ताधारी महायुती सरकारवर टीकास्त्रही सोडले.

आता साताऱ्यात एमडी ड्रग्स तयार करणारा कारखाना उजेडात आल्याचा दावा करत शिवसेना उद्धव बाळासाहेब ठाकरे पक्षाचे नेते अंबादास दानवे यांनी मुख्यमंत्री तथा राज्याचे गृहमंत्री असलेल्या देवेंद्र फडणवीस यांना काही प्रश्न उपस्थितीत केले आहेत. अंमली पदार्थाची वाढती तस्करी, उघडकीस येणारे कारखाने, नशेच्या आहारी गेलेली तरूणाई आणि त्यातून घडनारे गुन्हे, खून आणि अत्याचाराच्या घटनांमध्ये झालेली वाढ चिंचेचा विषय ठरत आहे.

अंमली पदार्थांमुळे जशी पंजाब राज्याची प्रतिमा देशपातळीवर मलीन झाली आणि यामुळे 'उडता पंजाब' म्हणून हे राज्य ओळखले जाऊ लागले. तशीच परिस्थिती महाराष्ट्राची होऊ घातली आहे. मग महाराष्ट्रालाही उडता महाराष्ट्र का म्हणू नये? असा सवाल अंबादास दानवे यांनी गृहमंत्री देवेंद्र फडणवीस यांना उद्देशून केला आहे. या निमित्ताने पुन्हा काही प्रश्न दानवे यांनी मुख्यमंत्र्यांना केले आहेत.

साताऱ्यात एमडी ड्रग्स तयार करणारा कारखाना उजेडात आला आहे. गृहमंत्री म्हणून जनतेच्या वतीने आपल्याला याबाबत काही प्रश्न आहेत देवेंद्र फडणवीस जी, असे म्हणत महाराष्ट्राला यामुळे 'उडता महाराष्ट्र' का म्हणू नये? असा टोला दानवे यांनी लगावला आहे. या शिवाय साताऱ्यातील कारखान्याचे मुंबई-पश्चिम बंगाल कनेक्शन हे सरकार मधील घटकांच्या पिल्लावळीपर्यंत आहे, हे सत्य आहे का? असा सवाल त्यांनी केला आहे.

एका विशिष्ट पक्षाचे साताऱ्यावर वर्चस्व आहे, म्हणून या कारखान्याला अभय होते काय? मुंबईतील पोलीस साताऱ्यात येऊन कारवाई करतात, सातारा पोलीस याबाबत गप्प कसे होते? आणि म्हशीच्या गोठ्यात ड्रग्ज तयार करण्याची ही प्रक्रिया कधीपासून सुरू होती? असे प्रश्न अंबादास दानवे यांनी सोशल मिडियाच्या माध्यमातून मुख्यमंत्र्यांना विचारले आहेत.