Jyoti Mete : मेटेंचे आरक्षणासाठीच बलिदान, डॉ. ज्योती मेटेंच्या उमेदवारीला पाठींबा द्या; समर्थकांचे जरांगेंना साकडे

दिवंगत लोकनेते, विनायकराव मेटे यांनी आपली तहहयात मराठा समाजाच्या आरक्षणासाठी काम केले. मराठा आरक्षणाच्या बैठकीसाठी जातानाच त्यांचे दुर्दैवी निधन झाले. आता त्यांच्या पत्नी डॉ. ज्योती मेटे बीड विधानसभा मतदारसंघातून निवडणुकीच्या रिंगणात उतरणार आहेत. त्यांच्या उमेदवारीला पाठींबा द्यावा, अशी गळ मेटे समर्थकांनी मराठा आरक्षण आंदोलक मनोज जरांगे यांना घातली.

सध्या मनोज जरांगे-पाटील ( Manoj Jarange Patol ) आंतरवाली-सराटी (जि. जालना) येथे राज्यभरातील विधानसभा मतदारसंघांचा आगामी विधानसभा निवडणुकीच्या अनुषंगाने आढावा घेत आहेत. जिल्ह्यातील राष्ट्रवादी काँग्रेस (शरदचंद्र पवार), काँग्रेस, भाजप, दोन्ही शिवसेना व राष्ट्रवादी काँग्रेस ( अजितदादा पवार ) अशा सर्वच पक्षांतील नेत्यांची आंतरवाली-सराटीला रिघ लागली आहे.

मागच्या दोन दिवसांत बीड जिल्ह्यातील केज, परळी, बीड, आष्टी, गेवराई व माजलगाव मतदारसंघांचा आढावा झाला. बीड मतदारसंघाच्या आढाव्यावेळी शिवसंग्रामच्या शिष्टमंडळाच्या वतीने मनोज जरांगे-पाटील यांना बीडमधून डॉ. ज्योती मेटे यांच्या उमेदवारीला पाठींबा द्यावा, असे साकडे घातले.

दिवंगत लोकनेते विनायकराव मेटे यांच्या आरक्षण चळवळीचा आणि आरबी समुद्रातील शिवस्मारक उभारणीसाठी केलेल्या प्रयत्नांचा यावेळी उहापोह करुन आता त्यांच्या पत्नी डॉ. ज्योती मेटे यांना पाठींबा देण्याची मागणी करण्यात आली.

याबाबत शिवसंग्रामचे प्रदेश उपाध्यक्ष प्रभाकर कोलंगडे, जिल्हाध्यक्ष नारायण काशीद, जिल्हा सरचिटणीस अनिल घुमरे, सनदी लेखापाल बी. बी. जाधव, सामाजिक कार्यकर्ते गवते, बीड विधानसभा प्रमुख प्रा. सुभाष जाधव, तालुकाध्यक्ष नवनाथ प्रभाळे, आष्टीचे ज्ञानेश्वर चौधरी, कृषी उत्पन्न बाजार समितीचे संचालक पंडित माने, सचिन काळकुटे, मजूर फेडरेशनचे संचालक बाळासाहेब हावळे, मुकुंद गोरे, गणेश धोंडरे, श्रीराम घोलप, शैलेश सुरवसे, सुहास मेटे, अनिल मोरे, विजय डोके आदींचे शिष्टमंडळ यावेळी मनोज जरांगे-पाटील यांना भेटले.