Police Letter Manoj Jarange : मनोज जरांगेंना मुंबई पोलिसांची नोटीस, आझाद मैदानावर आंदोलनाची परवानगी मिळणार? 'त्या' वक्तव्यांवर स्पष्टीकरण मागितले!

Mumbai Police Notice : मनोज जरांगे पाटील यांच्याकडून आझाद मैदान पोलिसांकडे आंदोलनासाठी पत्र दिले आहे. याआधी आंदोलनासाठी परवानगी देण्यास तब्बल तीन वेळा पोलिसांनी नकार दिला आहे. आता जरांगे पाटील आंदोलनाच्या परवानगीसाठी न्यायालयात जाण्याच्या तयारीत आहे. त्यातच आझाद मैदान पोलिसांनी जरांगे पाटील यांनी नोटीस पाठवून काही गोष्टींबाबत स्पष्टीकरण मागितले आहे. तसेच आंदोलनाची सविस्तर माहिती देण्यास सांगितले आहे.

जरांगे पाटील यांनी या आधीच्या पत्रात आपण एकटेच आंदोलन करणार आहोत, आपल्यासोबत 50 लोकं असतील, असे म्हटले होते. मात्र, ते मुंबईला निघालेले असताना त्यांच्यासोबत मोठा जनसमुदाय दिसून येतो आहे, याबाबत खुलासा करण्यास पत्रात सांगितले आहे.

तसेच जरांगे पाटील यांनी त्यांच्यासोबत किती स्वयंसेवक असणार आहेत, वाहनांचा तपशील, व्यक्तींची संख्या आणि स्वयंसेवकांची यादी सादर करण्यास सांगितलेआहे. जरांगे पाटील यांनी पोलिसांनी आपणे एकटेच आंदोलन करणार असे सांगितले आहे मात्र माध्यमांमधून त्यांनी मराठा समाजाला बॅगा भरून तयार राहा,वर्गणी तशीच राहू द्या मी म्हणेल तेव्हा मुंबईला या, असे आवाहन केले आहे, त्यामुळे त्यांच्या बोलण्यात विरोधाभास आहे, असे देखील पोलिसांनी नमूद केले आहे.

नारायण गडाचे महंत जरांगेंच्या भेटीला

मनोज जरांगे पाटील यांची प्रकृती ढासळत आहे. मात्र, त्यांनी उपचार घेण्यास नकार दिला आहे. ते आज पाटोद्याहून अहिल्यानगरकडे निघणार आहेत. दरम्यान, जरांगे पाटील यांनी उपचार घ्यावेत यासाठी नारायण गडाचे महंत शिवाजी महाराज हे जरांगेंच्या भेटीसाठी दाखल झाले आहेत. पोलिस अधिकारी देखील जरांगेना भेटण्यासाठी आले आहेत.

मागण्यांबाबत सरकार सकारात्मक

मनोज जरांगे पाटील यांच्या मागण्यांबाबत सरकार सकारात्मक असल्याचे मंत्री गिरीश महाजन यांनी सांगितले. तसेच ते म्हणाले, मनोज जरांगे पाटील यांच्यासोबत राधेकृष्ण विखे पाटील चर्चा करतील. मुख्यमंत्री, उपमुख्यमंत्री त्यांच्यासोबत चर्चा करू शकतात. सध्या सणावाराचे दिवस आहेत त्यामुळे त्यांनी मुंबईत येऊ नये.