Nitesh Rane : राणेंच्या वक्तव्याचा भाजपच्या कार्यकारी अध्यक्षांना फटका... पत्रकार परिषदच गुंडाळण्याची वेळ!

Nitesh Rane News : मंत्री नितेश राणे आपल्या वक्तव्यांमुळे नेहमीच वादात सापडतात. त्यांच्यामुळे औरंगजेबाच्या कबरीवरचा वाद निर्माण झाला होता. आता त्यांनी मुस्लिम समाजाने कुर्बानी देण्याऐवजी आभासी पद्धतीने ईद साजरी करण्याचा सल्ला देत नवा वाद ओढावून घेतला आहे. पण त्यांच्या या विधानामुळे भाजपचे वरिष्ठ नेते चांगलेच अडचणीत आले असल्याचे दिसून येते. नितेश राणे यांच्या याच वादग्रस्त वक्तव्यामुळे भाजपचे प्रदेश कार्यकारी अध्यक्ष रवींद्र चव्हाण यांना नागपूरमध्ये पत्रकार परिषद गुंडाळावी लागली.

राज्यात गोहत्या बंदी कायदा लागू आहे. त्यामुळे मुस्लिम समाजाने कुर्बानी देऊ नये असे सांगून राणे यांनी आभासी पद्धतीने ईद साजरी करावी असा सल्ला दिला होता. त्यामुळे मुस्लिम समाजात चांगलाच संताप निर्माण झाला आहे. अशातच संघटन पर्वाचा आढावा घेण्यासाठी आज प्रदेश भाजपचे कार्यकारी अध्यक्ष रवींद्र चव्हाण नागपूरला आले होते. संपूर्ण कार्यक्रमाची माहिती दिल्यानंतर राणे यांनी केलेल्या विधानावर त्यांना प्रश्न करण्यात आला होता.

यावर चव्हाण म्हणाले, राणे यांनी केलेल्या वक्तव्याचे भाजप समर्थन करत नाही. आम्ही सर्वच धर्माचे सणवार त्यांच्या रितिरिवाजानुसार साजरे करण्यासाठी आग्रही असतो. सर्व जाती, धर्मात तेढ निर्माण होऊ नये, त्यांच्या सामाजिक परंपरा जपल्या जाव्या हीच भाजपची भूमिका आहे. सध्या मी पक्षातील पदाधिकाऱ्यांची कार्यशाळा घेण्यासाठी आलो आहे. त्यानंतर तेव्हा कधी पत्रकार परिषद घेईल त्यावेळी तुमच्या प्रश्नांची उत्तरे दिली जातील असे सांगून त्यांनी पत्रकार परिषद गुंडाळली.

राज्य अल्पसंख्याक आयोगाचे अध्यक्ष प्यारे खान यांनीही नितेश राणे यांच्यावर सडकून टीका केली. राणे यांची मुख्यमंत्री देवेंद्र फडणवीस यांच्याकडे तक्रार करणार असल्याचे खान सांगितले. राणे राज्याला उध्वस्त करीत करून वाचाळवीराला आवरण्याची मागणी खान यांनी केली आहे. सोबतच अल्पसंख्याक आयोगाच्यावतीने त्यांना नोटीस बजावली जाणार असून या नंतर राज्यात अप्रिय परिस्थिती उद्भवल्यास तेच जबाबदार राहतील असाही इशारा दिला आहे. राणे यांच्यासारख्या नेत्यांमुळे मुख्यमंत्री देवेंद्र फडणवीस आणि भाजपची प्रतिमा खराब होत आहे याकडेही प्यारे खान यांनी लक्ष वेधले आहे.