Nagpur School News: राज्यातील जिल्हा परिषद शाळांमधील पायाभूत सुविधांची प्रत्यक्ष पाहणी करून सरकारचे पितळ उघडे पाडण्याची मोहीम ‘कॉक्रोच जनता पार्टी’ने हाती घेतल्याची चर्चा आहे. याच पार्श्वभूमीवर सरकारकडून शाळांच्या पायाभूत सुविधांची तपासणी करण्याचे आदेश देण्यात आल्याचेही बोलले जात आहे.
नागपूर जिल्हा परिषदेच्या तब्बल १ हजार ५०९ शाळांमधील पायाभूत सुविधांची आज (१ सप्टेंबर) प्रत्यक्ष पाहणी केली जाणार आहे. या तपासणीत शाळांच्या इमारती, वर्गखोल्या, स्वच्छतागृहे, पिण्याचे पाणी, वीज, फर्निचर, संगणक आणि डिजिटल सुविधा यांसह विविध बाबींची पडताळणी केली जाणार आहे. त्यामुळे जिल्हा परिषद शाळांमधील सुविधांची कागदावरील स्थिती आणि प्रत्यक्ष परिस्थिती यातील फरक समोर येण्याची शक्यता आहे.
नागपूर जिल्हा परिषदेच्या १ हजार ५०९ शाळांमध्ये तब्बल ६४ हजार ४८२ विद्यार्थी शिक्षण घेत आहेत. या विद्यार्थ्यांना उपलब्ध असलेल्या शैक्षणिक आणि भौतिक सुविधांची सद्यस्थिती जाणून घेण्यासाठी ही विशेष तपासणी मोहीम राबविण्यात येत आहे.
शाळेची इमारत आणि वर्गखोल्या सुरक्षित आहेत का, त्यांना विशेष दुरुस्तीची आवश्यकता आहे का, याची पाहणी अधिकाऱ्यांकडून केली जाणार आहे. त्याचबरोबर विद्यार्थ्यांना आवश्यक असलेल्या मूलभूत सुविधाही तपासल्या जाणार आहेत.
या प्रत्यक्ष तपासणीत मुला-मुलींसाठी स्वतंत्र स्वच्छतागृहे, पिण्याच्या पाण्याची व्यवस्था, वीज आणि प्रकाश व्यवस्था, फर्निचर तसेच शैक्षणिक साहित्य उपलब्ध आहे की नाही, याची पडताळणी होईल.
याशिवाय शाळांमध्ये असलेले संगणक, डिजिटल साधने, प्रयोगशाळा आणि ग्रंथालय यांचीही पाहणी केली जाणार आहे. केवळ सुविधा उपलब्ध असल्याची नोंद आहे की त्यांचा प्रत्यक्ष विद्यार्थ्यांना शैक्षणिक वापर करता येतो, हेही तपासले जाणार आहे.
दिव्यांग विद्यार्थ्यांसाठी आवश्यक असलेले रॅम्प आणि इतर सुविधा उपलब्ध आहेत का, याचीही तपासणी केली जाणार आहे. तसेच शाळांमध्ये अग्निसुरक्षेच्या दृष्टीने आवश्यक उपाययोजना आणि आपत्कालीन व्यवस्था आहे की नाही, याची पडताळणी होईल.
शाळेतील स्वच्छता, सुरक्षितता, परिसराची देखभाल, क्रीडा साहित्य तसेच खेळाचे मैदान यांची स्थितीही या पाहणीमध्ये तपासण्यात येणार आहे.
ग्रामविकास आणि पंचायत राज विभागाच्या मंत्र्यांनी २५ ऑगस्ट रोजी व्हिडिओ कॉन्फरन्सिंगद्वारे दिलेल्या निर्देशांनंतर ही विशेष पाहणी मोहीम सुरू करण्यात आली आहे. त्याआधी शिक्षण आयुक्तालय, पुणे यांनी २१ ऑगस्ट रोजी जिल्हा परिषद शाळांमधील पायाभूत सुविधांची तपासणी करण्याचे निर्देश दिले होते.
या आदेशानुसार तालुकानिहाय शाळांची यादी तयार करण्यात आली असून संबंधित अधिकाऱ्यांना **१ सप्टेंबर रोजी प्रत्यक्ष शाळांमध्ये जाऊन पाहणी करण्याचे** निर्देश देण्यात आले आहेत.
‘कॉक्रोच जनता पक्षाच्या या तपासणीमुळे जिल्हा परिषद शाळांमधील सुविधांची प्रत्यक्ष स्थिती स्पष्ट होण्यास मदत होऊ शकते. तसेच त्रुटी आढळल्यास भविष्यात त्या दूर करून शाळांमधील भौतिक सुविधा आणि शिक्षणाचा दर्जा सुधारण्याच्या दृष्टीनेही ही पाहणी महत्त्वाची ठरू शकते.
जिल्हा परिषद शाळांमध्ये विविध सुविधा उपलब्ध असल्याची नोंद कागदोपत्री असली, तरी त्या प्रत्यक्षात विद्यार्थ्यांच्या वापरासाठी योग्य स्थितीत आहेत का, हा महत्त्वाचा प्रश्न आहे.
स्वच्छतागृह आहे, पण वापरण्यायोग्य आहे का? संगणक उपलब्ध आहे, पण त्याचा विद्यार्थ्यांना उपयोग होतो का? ग्रंथालय आहे, पण त्याचा प्रत्यक्ष वापर होतो का? अशा अनेक प्रश्नांची उत्तरे या प्रत्यक्ष तपासणीतून मिळण्याची शक्यता आहे.
त्यामुळे १ सप्टेंबरची ही पाहणी केवळ सुविधांची संख्या मोजणारी न ठरताकागदावरील सुविधा आणि प्रत्यक्ष उपलब्धता यातील वास्तव समोर आणणारी ठरणार का, याकडे आता लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.