Naresh Arora: अजितदादांसह राष्ट्रवादीला 'प्रसिद्धी'च्या शिखरावर पोहोचवणाऱ्या कंपनीचं कॉन्ट्रॅक्ट रद्द! राष्ट्रवादीचा मोठा निर्णय

Naresh Arora: विधानसभा निवडणुकीवेळी ही लाडकी बहीण योजनेची कन्सेप्ट, अजितदादांचं गुलाबी जॅकेट अन् रंगसंगती त्याचबरोबर राष्ट्रवादी काँग्रेसला प्रसिद्धीच्या शिखरावर पोहोचवणाऱ्या नरेश अरोरा यांच्या डिझाईन बॉक्स कंपनीसोबतचा करार आता राष्ट्रवादी काँग्रेसनं रद्द केला आहे. अजित पवारांच्या निधनानंतर पक्षानं हा मोठा निर्णय घेतला आहे.

राष्ट्रवादीकडून डिझाईन बॉक्स या मीडिया कंपनीचं काम थांबवण्यात आलं आहे. डिझाईन बॉक्स कंपनीचे मालक नरेश अरोरा यांनी राष्ट्रवादी काँग्रेससाठी राजकीय सल्लागार म्हणून काम केलं आहे. २०२४च्या विधानसभा निवडणुकीवेळी डिझाईन बॉक्सनं राष्ट्रवादी काँग्रेससाठी पोलिटिकल कॅम्पेनचं काम केलं होतं. या कॅम्पेन दरम्यान, लाडकी बहीण योजनेच्या प्रचाराच्या अनुषंगानं गुलाबी रंगांची रंगसंगती राष्ट्रवादीच्या सर्व प्रचार साहित्यात झळकत होती. खुद्द अजितदादा हे गुलाबी जॅकेटमध्ये दिसू लागले होते.

प्रत्यक्ष निवडणूक प्रचार काळात राष्ट्रवादी काँग्रेसच्या वॉर रुम्स या गुलाबी रंगानं सजलेल्या दिसत होत्या. यामध्ये प्रत्येक पोस्टर, फ्लेक्स हे गुलाबी रंगसंगतीत होते, राष्ट्रवादीच्या झेंड्यासोबतच गुलाबी रंगाचे झेंडेही सर्वत्र दिसत होते. त्यानंतर निवडणुकीतही राष्ट्रवादी काँग्रेसला चांगलं यश मिळालं होतं, त्यामुळं गुलाबी रंग हा राष्ट्रवादी काँग्रेससाठी एका अर्थानं लकी ठरला होता. हे सर्व गुलाबी कॅम्पेन डिझाईन बॉक्स कंपनीनं अर्थात नरेश अरोरा यांनी केलं होतं.

दरम्यान, पण आता अजित पवारांच्या निधनानंतर या कंपनीचं काम पक्षाकडून थांबवण्यात आलं आहे. पण अचानक हा निर्णय का घेण्यात आला याचं कारण अद्याप कळू शकलेलं नाही.