शेखर गोरेंना अडचणीत आणणारेच आले अडचणीत

म्हसवड : स्वतःच्या अपहरणाचा खोटा बनाव करून शिवसेनेचे नेते शेखर भाऊ गोरे यांना विनाकारण अडचणीत आणण्याचा प्रयत्न करणाऱ्यांवरच म्हसवड पोलिसांनी विविध कलमान्वये गुन्हा दाखल केला आहे. डॉ. नानासो शिंदे यांच्यासह अन्य दोघांवर खोटी माहिती देवून खरी माहिती लपवल्याचे पोलिस तपासात निष्पन्न झाले आहे.

म्हसवड पोलिसांनी दिलेल्या माहितीनुसार, मागील काही महिन्यांपूर्वी माण तालुक्यातील पानवण येथील घडलेल्या अपहरण प्रकरणाच्या गुन्ह्यातील एकंदरीत तपासात २७ फेब्रुवारी २०२१ रोजी रात्री नऊ ते साडे दहाच्या दरम्यान, पानवण (ता. माण) हद्दीत पानवण ते ढाकणी जाणाऱ्या रोडवर कुंभेरीची वगळी जवळील पुलावर डॉ. नानासाहेब शिंदे (वय ५७), संजय किसन शिंदे (वय ३६), संतोष किसन शिंदे (वय ३५) सर्व राहणार पानवण (ता. माण) यांनी आपसात संगनमत करून डॉ. नानासो शिंदे यांच्या अपहरणाचा बनाव करून डॉ. शिदे यांनी स्वतःच गाडी (एम.एच १४ डी.ए.४००४) च्या शीटवर डिझेल ओतून पेटवुन दिली आहे, असा खोटा पुरावा तयार केल्याचे तपासात निष्पन्न झाले आहे.

तसेच त्यांनी घडल्या प्रकाराबाबत पोलिसांना खोटी माहिती देऊन शिवसेनेचे नेते शेखर भगवान गोरे यांना अडकविण्याच्या प्रयत्नातून अपहरणाचा बनाव केला आहे. त्यानुसार डॉ. नानासो आण्णा शिंदे, संजय किसन शिंदे, संतोष किसन शिंदे (सर्वजण रा. पानवण ता. माण) यांच्याविरुद्ध भा.द.वि कलम 435,176,177,182,193,195(अ),196,34 प्रमाणे तक्रार दाखल झाली आहे. अधिक तपास वरिष्ठांच्या सूचनेनुसार म्हसवड पोलिस ठाण्याचे सहाय्यक पोलिस निरीक्षक बाजीराव ढेकळे यांच्या मार्गदर्शनाखाली आर. व्ही. डोईफोडे करत आहेत.