भावाच्या अपघातानंतर गोपीचंद पडळकर सातारा दौरा सोडून विट्याकडे रवाना

सांगली : कार्यकर्त्याच्या मुलीच्या साखरपुड्यासाठी जात असताना भारतीय जनता पक्षाचे आमदार गोपीचंद पडळकर (Gopichand Padalkar) यांचे बंधू आणि सांगली जिल्हा परिषदेचे माजी सभापती ब्रम्हानंद पडळकर यांच्या मोटारीला आज (ता. १० एप्रिल) अपघात झाला. या अपघातात ब्रम्हानंद पडळकर यांच्यासह पाच जण गंभीर जखमी झाले असून विट्याच्या रुग्णालयात दाखल करण्यात आले आहे. अपघाताची बातमी कळताच आमदार पडळकर हे सातारा दौरा सोडून विट्याकडे रवाना झाले आहेत. (After brother's accident, Gopichand Padalkar left Satara tour and goes for Vita)

ब्रह्मानंद पडळकर हे एका कार्यकर्त्याच्या मुलीच्या साखरपुड्यासाठी जात होते. त्यावेळी विटा-कुंडल रस्त्यावर टेंपो आणि पडळकर यांच्या मोटारीची समोरासमोर धडक झाली. त्यात ब्रह्मानंद पडळकर यांच्यासह त्यांच्या गाडीचे चालक आणि इतर एक तिघे जखमी झाले आहेत. अपघतानंतर स्थानिक नागरिकांनी पडळकर यांना तातडीने विट्याच्या जवळच्या रुग्णालयात दाखल करण्यात आले आहे. या अपघातातील जखमींमध्ये टेंपो चालकाचाही समावेश आहे. अपघातानंतर विटा-कुंडल रस्त्यावरील वाहतूक विस्कळीत झाली होती.

दरम्यान, गोपीचंद पडळकर हे आज सातारा दौऱ्यावर होते. त्यांना अपघाताची माहिती मिळताच त्यांनी आपला सातारा दौरा स्थगित करत विट्याकडे रवाना झाले आहेत. जखमींना विट्याच्या रुग्णालयात दाखल करण्यात आलेले आहे. पडळकर हेही साताऱ्याहून थेट विट्यातील रुग्णालयाकडे निघाले आहेत.