Baramati, 24 June : माळेगाव सहकारी साखर कारखान्याच्या निवडणूक निकालात पहिल्यांदा ‘ब’ वर्ग गटाचा निकाल जाहीर झाला असून या प्रवर्गातून उपमुख्यमंत्री अजित पवार हे विजयी झाले आहेत. त्यांचा विजय अपेक्षित होता. त्यानंतर अनुसूचित जाती जमाती प्रवर्गातूनही उपमुख्यमंत्री पवार यांच्या पॅनेलचे रतनकुमार भोसले यांनी आघाडी घेतली आहे, त्यामुळे अजितदादांचा पॅनेल दुसरा विजय नोंदविणार का, याकडे बारामतीचे लक्ष लागले आहे.
माळेगाव सहकारी साखर कारखाना पंचवार्षिक निवडणुकीचा निकाल आज बारामतीत जाहीर होत आहे. प्रथम कारखान्याच्या ब वर्ग गटाची मतमोजणी करण्यात आली. त्यात उपमुख्यमंत्री अजित पवार यांना तब्बल 91 मते मिळाली आहेत, त्यांच्या विरोधातील तावरे गटाच्या सहकार बचाव पॅनेलचे उमेदवार भालचंद्र देवकाते यांना केवळ 10 मते मिळाली आहेत. अजित पवारांचा तब्बल ८१ मतांनी विजय झाला आहे.
ब वर्ग गटानंतर सध्या अनुसूचित जाती जमाती प्रवर्गाची मतमोजणी सुरू आहे. त्यात उपमुख्यमंत्री अजित पवार यांच्या नीलकंठेश्वर पॅनलचे रतनकुमार भोसले यांनी विरोधी गटाच्या उमेदवारावर निर्णायक आघाडी घेतली आहे. तावरे गटाचे सहकार बचाव पॅनेलचे उमेदवार बाबुराव गायकवाड पिछाडीवर पडले आहेत.
रतनकुमार भोसले यांनी गायकवाड यांच्यापेक्षा 110 मतांची आघाडी घेतली आहे, ती वाढत जाते की विरोधी गटाचे गायकवाड पुन्हा बाजी पलटवतात, हे पाहावे लागणार आहे.
दरम्यान, माळेगाव सहकारी साखर कारखान्यासाठी रविवारी चुरशीने ८८ टक्के मतदान झाले होते. सर्वाधिक चुरस ही खुल्या गटातील उमेदवारांमध्ये आहे. माळेगाव कारखान्यासाठी उपमुख्यमंत्री अजित पवार यांचा नीळकंठेश्वर पॅनेल, शरद पवार आणि युगेंद्र पवारांच्या नेतृत्वाखालील बळीराजा बचाव पॅनेल, चंद्रराव तावरे यांच्या नेतृत्वाखाली सहकार बचाव पॅनेल आणि शेतकरी संघटनांचे कष्टकरी शेतकरी पॅनेल असे चार पॅनेल निवडणूक लढवत आहेत.
पवारांचा पॅनेल कोणाची मते घेणार यावर विजयाचे गणित
माळेगाव सहकारी साखर कारखान्याच्या निवडणुकीत चार पॅनेल उतरले आहेत. एरव्ही तावरे विरुद्ध पवार अशी लढत होत असते. आता मात्र, पवारांचे दोन पॅनेल आहेत. त्यामुळे ज्येष्ठ नेते शरद पवार यांचा पॅनेल कोणाची मते घेणार, त्यावरच विजयाचे गणित अवलंबून आहे. पवारांचा पॅनेल कोणाची मते खाणार, त्यावरच विरोधी पॅनेलच्या विजयाचे भवितव्य असणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.