Solapur Dcc Bank : मोहिते पाटील, परिचारक, माने, म्हेत्रे, शिंदे, आवताडे, हसापुरे यांचे कारवाईला चॅलेंज; अर्ज अवैधतेविरोधात सहनिबंधकांकडे धाव

Solapur, 05 November : सोलापूर जिल्हा मध्यवर्ती सहकारी बँकेच्या निवडणुकीत उमेदवारी अर्ज अवैध ठरलेल्या माजी सात संचालकांनी सहनिबंधक दिग्विजय आहेर यांच्याकडे अपिल केले आहे. या अपिलावर उद्या ( शुक्रवारी, ता. ६ नोव्हेंबर) सुनावणी होणार आहे. सहकार कायदा कलम ८८ अन्वये व सहकार कायदा कलम ११० अ अन्वये झालेल्या कारवाईमुळे निवडणूक निर्णय अधिकारी तथा जिल्हा उपनिबंधक मुकुंद पवार यांनी हे अर्ज अवैध ठरविले होते.

माजी संचालकांमध्ये माजी आमदार रणजितसिंह मोहिते-पाटील, माजी आमदार संजयमामा शिंदे, माजी आमदार दिलीप माने, माजी आमदार राजन पाटील, माजी आमदार जयवंतराव जगताप, बबनराव आवताडे, सुरेश हसापुरे, रश्‍मी बागल या आठ जणांचे अर्ज कलम ८८ च्या कारवाईमुळे अपात्र करण्यात आले आहेत. यातील जगताप, बागल व राजन पाटील वगळता इतर पाच संचालकांनी अपिलात धाव घेतली आहे.

कलम ११० अ अन्वये झालेल्या कारवाईमुळे माजी संचालक तथा माजी आमदार प्रशांत परिचारक आणि माजी मंत्री सिद्धाराम म्हेत्रे यांचे अर्ज अपात्र झाले आहेत, या दोघांनीही अपिलात धाव घेतली आहे.

या अपिलावर शुक्रवारी (ता. ६) सुनावणी होणार असून, या निर्णयाकडे संपूर्ण जिल्ह्याचे लक्ष लागले आहे. या ठिकाणीही उमेदवारी अर्ज अवैध ठरल्यास या माजी संचालकांना उच्च न्यायालय आणि त्यानंतर सर्वोच्च न्यायालया दाद मागण्याचा पर्यय उपलब्ध असणार आहे.

अर्ज माघारीची प्रक्रिया १७ नोव्हेंबरपर्यंत राबविली जाणार आहे. त्यानंतर १८ नोव्हेंबरला चिन्हवाटप व निवडणूक लढणाऱ्या उमेदवारांची यादी प्रसिद्ध केली जाणार आहे. त्यापूर्वी अपिलात गेलेल्या माजी संचालकांना त्यांच्यासारखा निर्णय करून घेणे आवश्‍यक असणार आहे.

राम सातपुतेंच्या विरोधात जानकर उच्च न्यायालयात?

छाननीमध्ये अर्ज नामंजूर झाल्यास सहनिबंधक यांच्याकडे अपिल करता येते. छाननीत अर्ज मंजूर झाल्यास, त्या विरोधात उच्च न्यायालयात निवडणूक याचिका दाखल करून दाद मागता येते. छाननीत अर्ज मंजूर झालेल्यांमधील राम सातपुते यांच्या विरोधात उच्च न्यायालयात याचिका दाखल करण्याची तयारी आमदार उत्तम जानकर यांच्या गटाने केली असल्याचे समजते. जानकर यांच्या गटाने व या शिवाय आणखी कोणी न्यायालयात धाव घेतली आहे का?, हे देखील लवकरच स्पष्ट होणार आहे.