Satej Patil News : आमदार सतेज पाटलांवर काँग्रेसने दिली मोठी जबाबदारी

मुंबई : कोल्हापूर उत्तर मतदारसंघाची पोटनिवडणूक एकहाती जिंकून देणारे माजी गृहराज्यमंत्री तथा आमदार सतेज पाटील (satej Patil) यांच्यावर काँग्रेसने (Congress) मोठी जबाबदारी दिली आहे. विधान परिषदेतील गटनेतेपद पक्षाने सतेज ऊर्फ बंटी पाटील यांच्याकडे सोपवले आहे. (Appointment of Satej Patil as Congress Legislative Council group leader)

काँग्रेसचे विधिमंडळ पक्षनेते बाळासाहेब थोरात यांनी त्यांची नियुक्ती केल्याचे जाहीर केली आहे. विधान परिषदेच्या उपसभापती नीलम गोऱ्हे यांनी आज (ता. २ मार्च) सभागृहात बंटी पाटील यांच्या निवडीची घोषणा केली. पाटील यांच्या निवडीने एका तरुण नेत्याला पक्षाने काम करण्यास वाव दिला आहे.

सतेज पाटील यांनी कोल्हापूर जिल्ह्यात पक्ष संघटना वाढीस चालना दिली आहे. पक्षवाढीबरोबरच ‘गोकुळ’सारखा राज्यात नावाजलेला मोठा दूध संघ काँग्रेसच्या अखत्यारित आणला आहे. याशिवाय विधानसभेला कोल्हापूर दक्षिण या मतदारसंघातून पुतण्याला निवडणुकीच्या मैदानात उतरवून महाडिाकांना पराभूत करत काँग्रेसला जागा जिंकून दिली हेाती. तसेच, कोल्हापूर उत्तर मतदारसंघाच्या पोटनिवडणुकीत भाजपने ताकद लावलेली असूनही तो मतदारसंघ त्यांनी पक्षाला एकहाती जिंकून दिला होता. त्यामुळे त्यांचे पक्षात वजन वाढल होते. त्यामुळे त्यांच्यावर प्रदेशाध्यक्षपदाची जबाबदारी सोपवावी, अशी मागणी त्यांच्या समर्थकांकडून होत होती.

सतेज पाटील यांनी काँग्रेस आघाडी सरकारमध्ये राज्यमंत्री म्हणून काम पाहिले होते. तसेच २०१९ च्या महाविकास आघाडी सरकारमध्ये त्यांनी गृहराज्य मंत्री, ग्रामविकास, अन्न व औषध प्रशासन अशा विविध विभागांची जबाबदारी यशस्वीपणे पार पाडली आहे.

या निवडीनंतर सतेज पाटील म्हणाले की, काँग्रेस पक्षाने आजपर्यंत दिलेल्या जबाबदारीला न्याय देण्याचा प्रयत्न केला आहे. आता पक्षाने गटनेतेपदाची जबाबदारी दिली आहे, या पदालाही न्याय देण्याचा प्रयत्न करू. पक्षातील वरिष्ठ नेत्यांनी माझ्यावर विश्वास व्यक्त केला, त्याबद्दल सर्व वरिष्ठांचे आभार मानतो.