बाळासाहेब थोरात म्हणाले, भाजप व एमआयएम आमच्यासाठी सारखेच...

अहमदनगर - राज्यातील महाविकास आघाडीत सहभागी होण्याची एमआयएमने ( AIMIM ) तयारी दर्शविली आहे. त्या दृष्टीने महाविकास आघाडीत तीनही पक्षांतून वेगवेगळ्या प्रतिक्रिया उमटत आहेत. यावर काँग्रेसचे ज्येष्ठ नेते तथा राज्याचे महसूल मंत्री बाळासाहेब थोरात ( Balasaheb Thorat ) यांनी महत्त्वपूर्ण वक्तव्य केले आहे. ( Balasaheb Thorat said, BJP and MIM are the same for us ... )

बाळासाहेब थोरात म्हणाले, महाविकास आघाडीच्या आमदारांची 170 संख्या आहे. आम्ही 170 एकत्र आहोत. भक्कम आहोत. भाजपचा कोणताही नेता काहीही बोलावा आणि आम्ही त्याला उत्तरे द्यावीत असे अपेक्षित नाही. ते जेवढे प्रयत्न करतील, वेगळं बोलतीलं तेवढे आम्ही पक्के होत जाणार. मुख्यमंत्री उद्धव ठाकरे यांच्या नेतृत्त्वावर आम्हाला विश्वास आहे. आम्ही एकत्रितपणे चांगलं काम करत आहोत. महाविकास आघाडी भक्कम आहे.

थोरात पुढे म्हणाले की, आम्हाला कोणताच कट्टरवाद मान्य नाही. कोणत्याही जाती - धर्माचा कट्टरवाद आम्हाला अपेक्षित नाही. आम्हाला सर्वधर्म समभाव अपेक्षित आहे. त्या तत्त्वज्ञानानुसार आम्ही पुढे जात आहोत. भाजपचा कट्टरवाद काय अथवा एमआयएमचा कट्टरवाद काय समान आहेत. आम्हाला कट्टरवाद नको आहे, असे मत बाळासाहेब थोरात यांनी मांडले.