भानुदास मुरकुटे म्हणाले, विश्‍वासाला तडा जाऊ देणार नाही...

बापूसाहेब कोकणे

टाकळीभान ( जि. अहमदनगर ) : अशोक सहकारी साखर कारखान्याची नुकतीच निवडणूक झाली. या निवडणुकीत माजी आमदार भानुदास मुरकुटे ( Bhanudas Murkute ) यांच्या पॅनेलने सर्व जागा मिळवत वर्चस्व राखले. त्यामुळे या कारखान्यावरील 33 वर्षांपासूनची सत्ता भानुदास मुरकुटे यांनी राखली. Bhanudas Murkute said, faith will not be shattered ...

बेलापूर (ता. श्रीरामपूर) येथील नूतन संचालकांचा सत्कार समारंभ झाला. अध्यक्षस्थानी प्रकाश नाईक होते. जिल्हा बँकेचे संचालक करण ससाणे, सुभाष पटारे, जिल्हा परिषद सदस्य शरद नवले, बाजार समितीचे संचालक सुधीर नवले, द्वारकानाथ बडधे, सुवालाल लुक्कड, अनिल पा. नाईक, जालिंदर कुऱ्हे, भास्कर खंडागळे, विलास मेहेत्रे, उपसरपंच अभिषेक खंडागळे, दत्ता कुऱ्हे, भास्कर बंगाळ, भाऊसाहेब कुताळ, शेषराव पवार, प्रकाश नवले, प्रभाकर कुऱ्हे, सुरेश कुऱ्हे, साहेबराव वाबळे उपस्थित होते.

भानुदास मुरकुटे म्हणाले, अशोक सहकारी साखर कारखान्याच्या सभासदांनी लोकसेवा विकास आघाडीच्या सर्व उमेदवारांना निवडून दिले. आमच्यावर तुम्ही दाखविलेल्या विश्वासास कधीही तडा जाऊ दिला जाणार नाही.

मुरकुटे पुढे म्हणाले की, आसपासच्या तालुक्यांतील साखर कारखान्यांची काय अवस्था आहे, हे सुज्ञ मतदारांना ज्ञात आहे. त्यामुळे त्यांनी लोकसेवा मंडळाच्या सर्व संचालकांना भरघोस मतांनी निवडून दिले. कारखान्याच्या कार्यक्षेत्राबाहेर ऊस आणला. या उसालाही सभासदांप्रमाणेच भाव दिलेला आहे. कारखान्याच्या इथेनॉल प्रकल्पाची क्षमता वाढविण्याचा विचार असून, आधुनिक तंत्रज्ञानासह पाच हजार टन क्षमतेचा नवीन प्रकल्प उभारण्याचा मानस आहे. तसेच वीजनिर्मितीतही वाढ करण्याचे नियोजन असल्याचे मुरकुटे यांनी सांगितले.

जालिंदर कुऱ्हे, बाळासाहेब वाबळे आदींनी मनोगत व्यक्त केले. प्रास्ताविक उपसरपंच अभिषेक खंडागळे यांनी केले. महेश कुऱ्हे यांनी सूत्रसंचालन केले. अनिल नाईक यांनी आभार मानले.