आमदार नितेश राणेंची प्रकृती आणखी खालावली; 'आयसीयू'मध्ये हलवलं

कोल्हापूर : भाजपचे आमदार नितेश राणे (Nitesh Rane)यांची प्रकृती आणली बिघडली आहे. त्यांच्या छातीत दुखत असून, त्यांच्यावर कोल्हापुरातील राजर्षी छत्रपती प्रमिला राजे (सीपीआर) रुग्णालयात उपचार सुरू आहेत. आज त्यांना अतिदक्षता विभागात (ICU) दाखल करण्यात आले आहे. तज्ञ डॉक्टरांचे पथक त्यांच्या प्रकृतीवर लक्ष ठेवून आहे. दरम्यान, राणेंच्या जामिनावर न्यायालयात सुनावणी सुरू आहे. (Nitesh Rane Health Updates)

नितेश राणेंच्या छातीत दुखत असल्याने आणि मणक्याचा त्रास असल्याने काल पोलीस बंदोबस्तात कोल्हापूरला हलवण्यात आले आहे. त्यांच्यावर सीपीआर रुग्णालयातील हृदयरोग विभागात उपचार सुरू आहेत. राणेंचा त्रास आणखी वाढल्याने त्यांना आयसीयूमध्ये हलवण्यात आले आहे. तज्ञ डॉक्टरांचे पथक त्यांच्या प्रकृतीवर लक्ष ठेवून आहे. या पथकात हृदयरोगतज्ञ आणि अस्थिरोगतज्ञांचा समावेश आहे, अशी माहिती वैद्यकीय अधिकारी गिरीश कांबळे यांनी दिली.

न्यायालयीन कोठडीत असलेल्या नितेश राणेंनी छातीत दुखत असल्याची तक्रार केली होती. त्यानंतर त्यांना सिंधुदुर्ग जिल्हा रुग्णालयात दाखल करण्यात आले होते. मात्र, तेथे हृदयरोगतज्ञ नसल्याने त्यांना कोल्हापूरला हलवण्याचा निर्णय घेण्यात आला. त्यांना 7 फेब्रुवारीला रुग्णवाहिकेतून कोल्हापूरला हलवण्यात आले. राणेंना कोल्हापुरातील सीपीआर रुग्णालयात हलवण्याच्या हालचाली दोन दिवसांपासून सुरू होत्या.

पोलिसांना शरण गेल्यानंतर राणेंना 2 फेब्रुवारीला अटक करण्यात आली. त्यानंतर न्यायालयाने दोन दिवसाची पोलिस कोठडी सुनावली. नंतर त्यांची रवानगी न्यायालयीन कोठडीत करण्यात आली. राणेंच्या वकिलांनी जामिनासाठी अर्ज दाखल केला आहे. यावर आज होणारी सुनावणी पुढे ढकलली गेली आहे. मागील सुमारे महिनाभरापासून नितेश राणे गायब होते. ते नंतर प्रकटले होते आणि काही दिवस कणकवली पोलिस ठाण्यात चौकशीसाठी हजेरी लावत होते. उच्च न्यायालयाने राणेंचा अटकपूर्व जामीन अर्ज 17 जानेवारीला फेटाळला होता. नंतर सर्वोच्च न्यायालयानेही जामीन फेटाळल्याने राणे सत्र न्यायालयासमोर शरण आले होते. (Nitesh Rane News)