भाजपच्या वरुडे बंधूंचा गडाख गटात प्रवेश

Shankarrao Gadakh : माजी आमदार बाळासाहेब मुरकुटे यांचे जवळचे नातेवाईक व मागील दोन विधानसभा निवडणुकीत 'भाजप' च्या प्रचाराची धुरा संभाळणारे खुपटी येथील वरुडे बंधू आणि मित्र मंडळाने माजी मंत्री शंकरराव गडाख ( Shankarrao Gadakh ) गटात प्रवेश केला आहे. हा प्रवेश गडाख गटाची बाजू मजबूत करणारा असल्याने सोनईकर सुखावले आहेत.

राजकीय डावपेच व निवडणुकीतील व्यूहरचनेत तरबेज असलेले खुपटी येथील बाळासाहेब वरुडे, चांगदेव वरुडे, नामदेव वरुडे व शंभरहून अधिक कार्यकर्त्यांनी आज माजी आमदार मुरकुटे गटाला सोडचिठ्ठी देवून माजी मंत्री गडाख गटात प्रवेश केला आहे. जिल्हा परिषद, पंचायत समिती, नेवासे नगरपंचायत व तालुक्यातील ग्रामपंचायत निवडणुकीच्या तोंडावर मुरकुटे गटाची गळती थांबण्याचे नाव घेत नसल्याचे चित्र सहा महिन्यापासून पाहण्यास मिळत आहे.

प्रवरानदीच्या काठावर असलेल्या खुपटी गावात झालेल्या कार्यक्रमात वरुडे यांनी माजी आमदार मुरकुटे यांच्या कार्यपद्धतीवर टीका करत गाव व तालुक्यातील विकास कामासाठी आम्ही गडाखांच्या पाठिशी उभा राहिलो असे नामदेव वरुडे यांनी सांगितले.यावेळी मुळा कारखान्याचे अध्यक्ष नानासाहेब तुवर, उपाध्यक्ष कडुबाळ कर्डिले, माजी उपाध्यक्ष भाऊसाहेब मोटे, विक्रम चौधरी, संभाजीराव कार्ले, सरपंच गोरख तनपुरे, अशोक चौधरी उपस्थित होते.

माजी आमदार बाळासाहेब मुरकुटे यांच्या देवगावातील सेवा संस्थेत गडाख गटाचा झेंडा लागला. ग्रामपंचायतीचे उपसरपंच व काही सदस्य गडाख गटात आले. मुरकुटे यांचे पुतणे अजित मुरकुटेसह देडगाव, कुकाणे व परिसरातील अनेक कार्यकर्त्यांनी गडाख गटात प्रवेश केल्याने मुरकुटे हतबल झाल्याचे चित्र पाहण्यास मिळत आहे.