Jayant Patil News | एसटी बस चालवणे पडले महागात; जयंत पाटलांविरोधात तक्रार दाखल

सांगली : राष्ट्रवादीचे प्रदेशाध्यक्ष जयंत पाटील (Jayant Patil) यांना एसटी बस चालवणे पडणार महागात पडणार आहे. बेकायदेशीरपणे एसटी बस चालवल्याप्रकरणी जयंत पाटील यांच्यावर गुन्हा दाखल करण्यात यावा, अशी मागणी करत भाजपचे (BJP) वाळवा तालुकाध्यक्ष धैर्यशील मोरे यांनी इस्लामपूर पोलिसात तक्रार दिली आहे.

दोन दिवसांपूर्वी स्वातंत्र्य दिनानिमित्त जयंत पाटील यांनी थेट एसटी चालवण्याचा अनुभव घेतला. अमृत महोत्सवी स्वातंत्र्य दिनानिमित्त जयंत पाटलांनी इस्लामपूर आगारामध्ये जाऊन एसटी कर्मचाऱ्यांची भेट घेतली. त्यानंतर त्यांनी थेट एसटीचे स्टेरिंग हातात घेत फेरफटकाही मारला. पण आता त्यांचे हेच पाऊल त्यांच्या अडचणी वाढवणार असल्याचे दिसत आहे.

बेकायदेशीरपणे एसटी बस चालवल्याप्रकरणी आमदार जयंत पाटील यांच्यावर गुन्हा दाखल करण्याबाबत भाजप नेत्यांनी इस्लामपूर पोलिस स्टेशनमध्ये तक्रार दिली आहे. एसटी चालवण्याचा कोणताही अनुभव नसताना, किंवा जड वाहन चालक म्हणून आवश्यक असणाऱ्या परवाना किंवा, बॅच बिल्ला नसताना जड वाहन बेकायदेशीरित्या चालवल्याचा आरोप भाजप धैरशील मोरे यांच्याकडून करण्यात आला आहे.

स्वातंत्र्य दिनी जयंत पाटलांनी एसटीचीही माहिती घेत थेट एसटी बस चालवली. इस्लामपूर शहरातील रस्त्यावरून त्यांनी एसटी चालवण्याचा अनुभव घेतला. एसटी चालवतानाचा व्हिडीओ सोशल मीडियावरही चांगलाच व्हायरल झाला. यावेळी त्यांनी चालकाकडून एसटी कशी चालवायची, एसटीतील तांत्रिक बाबीही जाणून घेतल्या होत्या. मात्र आता त्यांना हेच एसटी बस चालवणं महागात पडणार असल्याचं दिसत आहे.