Mahabaleshwar : बेकायदेशीर बांधकाम असलेल्या हॉटेलमध्ये मुख्यमंत्र्यांचा मुक्काम... सचिन मोहिते

सातारा : बेकायदेशीर बांधकाम असलेल्या महाबळेश्वरातील हॉटेलमध्ये मुख्यमंत्र्यांचा मुक्काम असून या हॉटेलच्या या बांधकामाविषयी वारंवार तक्रारी होऊनही प्रशासनाकडून कारवाई झालेली नाही. बेकायदेशीर बांधकाम असलेल्या हॉटेलमध्ये मुक्कामी राहून मुख्यमंत्र्यांकडून या बांधकामांना अभय देण्याचा प्रयत्न होत आहे का, असा प्रश्न शिवसेनेचे जिल्हा प्रमुख सचिन मोहिते यांनी उपस्थित केला आहे.

यासंदर्भात सचिन मोहितेंनी काढलेल्या निवेदनात म्हटले की, मुख्यमंत्री एकनाथ शिंदे सध्या महाबळेश्वरला खासगी दौऱ्यावर आलेले आहेत. त्यांचा मुक्काम एका हॉटेलमध्ये आहे. बेकायदेशीर बांधकामे असलेल्या एका हॉटेलमध्ये त्यांचा मुक्काम आहे. या हॉटेलच्या बेकायदेशीर बांधकामांबाबत सामाजिक कार्यकर्त्यांकडून वारंवार तक्रारी होऊनही जिल्हा प्रशासनाकडून कारवाई होताना दिसत नाही.

यासंदर्भात विविध पुरावे सामाजिक कार्यकर्त्यांनी प्रशासनाला दिले आहेत. यावरून अतिक्रमणे काढण्याचे आदेश झालेले आहेत. असे असतानाया हॉटेलची बांधकामे होत आहेत. महाबळेश्वरात दुसरी अनेक हॉटेल्स असताना मुख्यमंत्री याचा हॉटेलमध्ये मुक्कामी का राहिलेत, असा प्रश्न उपस्थित करून श्री. मोहिते म्हणाले की, त्यांच्या या मुक्कामातून हॉटेलच्या बेकायदेशीर बांधकामाना अभय देण्याचा प्रयत्न होत नाही ना, असा आरोपही श्री. मोहिते यांनी केला आहे.