Congress News : सोलापूरमध्ये काँग्रेसची धुळधाण : 12 नगरपालिकांमध्ये 'पंजावर' फक्त 2 नगरसेवक विजयी; प्रणिती शिंदे आहेत कुठे?

Congress News : जिल्ह्यातील नगरपालिका निवडणुकीत काँग्रेसचा मोठा दारूण पराभव पत्कारावा लागला आहे. नगरपालिकेतील उमेदवारांचा पराभव हा खासदार प्रणिती शिंदे यांच्यासाठी मोठा धक्का मानला जात आहे. 5 नगरपालिकेत नगराध्यक्षपदाचा उमेदवार उभे केले होते, पण पाचही ठिकाणी उमेदवाराचा पराभव झाला आहे.

12 नगरपालिकेपैकी अक्कलकोट नगरपालिकेत केवळ २ नगरसेवक निवडून आले आहेत. यामुळे जिल्ह्यात सर्वात मोठा पक्ष असलेल्या काँग्रेसवर पराभवाची नामुष्की ओढवली आहे. मंगळवेढा व पंढरपूर नगरपालिकेत स्थानिक आघाडी केली होती, त्यास आम्ही पाठिंबा दिला असून पंढरपूर नगराध्यक्षपदाच्या उमेदवार प्रणिता भालके या काँग्रेसच्या असल्याचा दावा काँग्रेस जिल्हाध्यक्षांनी केला आहे.

मोहोळ, बार्शी व अक्कलकोट नगरपालिकेत नगराध्यक्ष पदाच्या उमेदवाराचा पराभव झाला आहे. तर अक्कलकोट वगळता इतर ठिकाणी एकही नगरसेवक विजयी झाला नाही. कुर्डूवाडी व मैंदर्गी येथेही नगरपालिकेतही काँग्रेसला पराभवास सामोरे जावे लागले आहे. सांगोला व करमाळा येथे एकही उमेदवार दिले नव्हते. काँग्रेसकडून उभारलेल्या उमेदवारांचा मोठ्या फरकाने पराभव झाला आहे. नगराध्यक्षपदाचे उमेदवार काही ठिकाणी चौथ्या तर काही ठिकाणी पाचव्या क्रमांकावर गेले आहेत.

धनशक्तीचा विजय...

विरोधी पक्षाने निवडणुकीत सर्व बळाचा वापर केला. इतर पक्षातील पदाधिकारी व कार्यकर्त्यांना प्रवेश देऊन तिकिटे दिली. निवडणुकीत धनशक्तीचा वापर केला. काँग्रेसने सर्वसामान्यांना संधी दिली होती. पक्षांसाठी काम करणाऱ्या न्याय देण्याची ही निवडणूक होती. या निवडणुकीत जनशक्तीविरोधात धनशक्तीचा विजय आहे, असे काँग्रेसचे जिल्हाध्यक्ष सातलिंग शटगार म्हणाले.

गद्दारांमुळे काँग्रेसचा पराभव...

नगरपालिका निवडणुकीत काँग्रेसच्या काही पदाधिकाऱ्यांनी पक्षात राहूनच गद्दारी केली आहे. शेवटच्या टप्प्यात विरोधकांना मदत केल्याने काही उमेदवारांचा पराभव झाला आहे. गद्दारी करणाऱ्या सर्व पदाधिकाऱ्यांवर कारवाई होण्यासाठी अहवाल प्रदेशपातळीवर पाठवला आहे.