सुजय विखेंना कोरोनाची लागण

अहमदनगर - अहमदनगर दक्षिण लोकसभा मतदार संघातील भाजपचे खासदार डॉ. सुजय विखे पाटील ( Dr. Sujay Vikhe Patil ) यांना कोरोनाची लागण झाली आहे. या संदर्भातील माहिती त्यांनी स्वतःच सोशल मीडियावरून दिली. Dr. Sujay Vikhe Patil News Update

खासदार डॉ. सुजय विखे पाटील यांना कोरोनाची लागण होण्याची ही दुसरी वेळ आहे. सहा महिन्यांपूर्वीही त्यांना कोरोनाची लागण झाली होती. त्यांना कोरोनाची लक्षणे जाणवताच त्यांनी स्वतःहून कोरोना चाचणी करून घेतली. कोरोना अहवाल पॉझिटिव्ह आल्यावर त्यांनी विलगीकरणात राहणे पसंत केले आहे.

या बाबतची माहिती त्यांनी सोशल मीडियावर देताना म्हंटले आहे की, माझी कोरोना चाचणी पॉझिटिव्ह आली असून डॉक्टरांच्या सल्ल्यानुसार वैद्यकीय उपचार सुरू केले आहेत. माझ्या संपर्कात आलेल्या सर्वांनी काळजी घ्यावी व लक्षणे दिसल्यास तात्काळ कोरोना चाचणी करून घ्यावी, असे त्यांनी म्हंटले आहे.

खासदार विखे पाटील लवकर बरे व्हावेत असे संदेश त्यांच्या कार्यकर्त्यांकडून सोशल मीडियावर व्हायरल होऊ लागले आहेत. अहमदनगर जिल्ह्यात सध्या 304 जण कोरोनाचे उपचार घेत आहेत.