Solapur, 11 July : डॉ. शिरीष वळसंगकर यांच्या आत्महत्येप्रकरणी आता त्यांच्या पत्नी डॉ. उमा वळसंगकर यांनी रुग्णालयाची प्रशासकीय अधिकारी मनीषा मुसळे माने हिच्या विरोधात आणखी एक तक्रार पोलिस ठाण्यात दिली आहे. मनीषा मुसळे माने हिच्या विरोधात डॉ. उमा वळसंगकर यांनी आर्थिक गैरव्यवहाराची तक्रार दिली असून तसा गुन्हा दाखल करण्यात यावा, अशी मागणी त्यांनी सदर बझार पोलिसांकडे केली आहे.
दरम्यान, डॉ. उमा वळसंगकर यांनी मनीषा मुसळे माने हिच्या विरोधात आर्थिक गैरव्यवहारासंबंधी गुन्हा दाखल करण्यासाठी पोलिसांत अर्ज दाखल केल्याने डॉ. शिरीष वळसंगकर यांनी नेमकी कोणत्या कारणामुळे आत्महत्या केली, असा प्रश्न उपस्थित होत आहे. आता डॉ. उमा वळसंगकर यांच्या अर्जानुसार चौकशी करून गुन्हा दाखल करण्यात येईल, असे वरिष्ठ पोलिस अधिकाऱ्यांनी स्पष्ट केले.
डॉ. शिरीष वळसंगकर यांनी १८ एप्रिल रोजी राहत्या घरी गोळ्या झाडून आत्महत्या केली होती. डॉक्टरांच्या खिशात सापडलेल्या चिठ्ठीच्या आधारे वळसंगकर हॉस्पिटलची प्रशासकीय अधिकारी मनीषा मुसळे माने हिला १९ एप्रिल रोजी अटक केली होती. त्यानंतर मनीषा मुसळे माने हिला दोन महिन्यानंतर जामीन मिळाला आहे. मनीषा मुसळे माने ही सध्या जामीनावर बाहेर आहे.
डॉक्टरांच्या आत्महत्येनंतर दहा दिवसांनंतर म्हणजे २९ एप्रिल रोजी डॉ. उमा वळसंगकर यांनी मनीषा मुसळे माने हिच्या घरच्या पत्त्यावर पत्र पाठविले होते. त्या पत्राद्वारे ‘तुमच्याविरोधात कोणतेही आरोप न करता किंवा कोणताही ठपका न ठेवता, तुमची प्रशासकीय अधिकारीपदाची सेवा ही १ मे २०२५ पासून समाप्त करण्यात येत आहे, असे म्हटले होते.
याशिवाय २७ एप्रिल रोजी उमा वळसंगकर यांनी पोलिसांना दिलेल्या लेखी जबाब दिला होता. त्यात मनीषा मुसळे माने हिचा रुग्णालयातील कर्मचाऱ्यांना त्रास होत होता. तसेच, आर्थिक गैरव्यवहार या दोन्हीबाबत डॉ. शिरीष वळसंगकर यांना माहिती झाली होती. त्यामुळे डॉक्टरांनी मनीषा हिचे हॉस्पिटलचे प्रशासकीय अधिकार काढून ते नेवरेकर यांच्याकडे, तर स्टोअरच्या सामान खरेदीसाठी वैद्य या दोघांची नियुक्ती करण्यात आली होती, असेही उमा वळसंगकर यांनी म्हटले आहे.
डॉक्टारांच्या घरात सीसीटीव्ही नव्हते
डॉ. शिरीष वळसंगकर यांनी आत्महत्या करण्यापूर्वीच्या तीन दिवसांत ११ कॉल एका व्यक्तीला केल्याचे पुढे आले होते. त्याबाबत दोषारोपत्रात जबाब नसल्याचे सूत्रांकडून सांगण्यात आले. तसेच, वळसंगकर यांच्या घरी कोण कोण आले होते, याची माहिती घेण्यासाठी सीसीटीव्ही फूटेज जप्त करणार असल्याचे पोलिस अधिकाऱ्यांनी त्यावेळी स्पष्ट केले होते.
डॉ. वळसंगकर यांच्या घरात सीसीटीव्ही कॅमेरे नव्हते, असे पोलिसांकडून सांगण्यात येत आहे. तरीही घराच्या आजूबाजूला सीसीटीव्ही कॅमेरे असतानाही त्याची पडताळणी झाल्याचा उल्लेख दोषारोपपत्रात दिसत नाही. आता यावर २९ जुलैला मनीषाचे वकील प्रशांत नवगिरे न्यायालयात काय बाजू मांडणार?, याकडे सर्वांचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.