Hasan Mushrif News : हसन मुश्रीफांना ईडीचा पुन्हा दणका; कोल्हापूर जिल्हा बॅंकेवर छापेमारी

ED Action News : माजी कामगार मंत्री आणि कोल्हापूर (Kolhapur) जिल्ह्यातील राष्ट्रवादी काँग्रेसचे हसन मुश्रीफ यांच्या ताब्यात असलेल्या कोल्हापूर जिल्हा बँकेत ईडीने (ED) आज (ता. 1) छापेमारी केली. कागल तालुक्यातील सेनापती कापशीच्या शाखेमध्येही ईडी अधिकारी पोहोचले.

गेल्या महिन्यातच हसन मुश्रीफ (Hasan Mushrif) यांचे निवासस्थान, त्यांचे निकटवर्तीय माजी नगराध्यक्ष प्रकाश गाडेकर यांचे निवासस्थान आणि सरसेनापती संताजी घोरपडे कारखाना या ठिकाणी छापेमारी केली होती. त्यानंतर पुन्हा एकदा आता जिल्हा बॅंकेवर छापेमारी करण्यात आली आहे. जिल्हा बॅंक अनेक वर्ष मुश्रीफांच्या ताब्यात आहे.

तसेच 11 जानेवारीला ईडीच्या अधिकाऱ्यांनी पुण्यामध्येही मुश्रीफ यांच्याशी संबंधित चार ठिकाणी छापे टाकले होते. शिवाजीनगर येथील कार्यालय, हडपसर आणि कोंढवा भागातही अधिकाऱ्यांनी तपासणी केली होती. त्यानंतर आज पुन्हा एकदा छापेमारी करण्यात आली आहे.

ईडीने केलेल्या छापेमारीनंतर कोल्हापूर जिल्ह्यातील कागल तालुक्यातील राजकारणात आरोप प्रत्यारोपांच्या फैरी रंगल्या होत्या. ईडी कारवाई भाजपच्या जिल्हा अध्यक्षांच्या इशाऱ्याने झाल्याचा आरोप मुश्रीफ यांनी केला होता. ईडीच्या छापेमारीनंतर आरोप करणाऱ्या भाजप नेते माजी खासदार किरीट सोमय्यांनी कोल्हापूर दौरा केला होता.