Satara News : शासकिय जागेत अतिक्रमण करणे भोवले; पुसेगावचे सरपंच अपात्र

-ऋषिकेश पवार

Khatav News : राजकीयदृष्ट्या अतिशय महत्त्वाच्या समजल्या जाणाऱ्या पुसेगाव ग्रामपंचायतीचे सरपंच विजय कृष्णा मसणे यांना सरकारी जागेत अतिक्रमण करून घर बांधकाम केल्याने जिल्हाधिकारी रुचेश जयवंशी Satara Collector यांनी अपात्र ठरवले आहे. अपात्र ठरविण्यात आल्यामुळे श्री. मसणे यांना सरपंचपदावरून पायउतार व्हावे लागणार आहे.

याबाबत अधिक माहिती अशी, जानेवारी २०२१ मध्ये ग्रामपंचायत निवडणूक प्रक्रियेनंतर सरपंचपद Sarpanch पदासाठी आरक्षित झालेली अनुसूचित जातीचा पुरुष या एकमेव जागेवर निवडून आल्याने विजय मसणे यांची सरपंचपदावर वर्णी लागली होती.

विजय मसणे यांच्या मालकीच्या पुसेगाव हद्दीतील मिळकत क्रमांक ८४१ चे क्षेत्र सार्वजनिक रस्त्याच्या हद्दीत असल्याचे भूमिअभिलेख अधीक्षक यांनी दिलेल्या अहवालात निदर्शनास आले आहे. त्यामुळे मसणे यांनी शासनाच्या जागेत कायम स्वरुपी बांधकाम करत अतिक्रमण केल्याचे सिद्ध झाले आहे.

याबाबत माजी ग्रामपंचायत सदस्या शोभा घनशाम मसणे यांनी विजय मसणे यांच्या विरोधात तक्रार अर्ज केला होता. तो ग्राह्य मानून जिल्हाधिकाऱ्यांनी विजय मसणे यांना ग्रामपंचायत अधिनियम १९५९ चे कलम १४ (ज-३) व कलम १६(२) अन्वये अपात्र ठरवले आहे.