Dairy fraud : गोठ्यात गायी नाहीत, तरी तयार होत होतं शेकडो लीटर दूध; साताऱ्यात FDA च्या छाप्यात बनावट दूध रॅकेटचा पर्दाफाश

Satara News : सातारा जिल्ह्यातील फलटण तालुक्यात अन्न व औषध प्रशासनाच्या धाडीत बनावट दूध निर्मितीच्या रॅकेटचा पर्दाफाश करण्यात आला आहे. विशेष म्हणजे, ज्या ठिकाणी ही कारवाई केली, त्या गोठ्यात प्रत्यक्षात गायी नसतानाही दूध तयार केले जात असल्याचे तपासात समोर आले. या घटनेमुळे परिसरात मोठी खळबळ उडाली असून नागरिकांमध्ये चिंतेचे वातावरण निर्माण झाले आहे.

नीरा नदीकाठच्या होळ गावातील संशयित गोठ्यावर अन्न व औषध प्रशासनाच्या पथकाने अचानक छापा टाकला. तपासणीदरम्यान केमिकलच्या साहाय्याने बनावट दूध तयार केल्याचा प्रकार समोर आला. रोजचे किमान 30 ते 35 लिटर असे दूध इथे तयार होत असल्याची माहिती आहे. पथकाने संशयास्पद साहित्य जप्त करून त्याचे नमुने तपासणीसाठी पाठवले आहेत. तसेच संबंधितांविरोधात फलटण ग्रामीण पोलीस ठाण्यात गुन्हा दाखल करण्यात आला आहे.

या कारवाईनंतर फलटण तालुक्यात अशा प्रकारचे बनावट दूध तयार करणारे जाळे कार्यरत असल्याची चर्चा पुन्हा सुरू झाली आहे. नागरिकांच्या मते, ही कारवाई केवळ सुरुवात असून अशा अनेक ठिकाणी अजूनही केमिकलयुक्त दूध तयार होत असल्याचा संशय आहे. त्यामुळे अन्न व औषध प्रशासनाने किरकोळ कारवायांवर न थांबता संपूर्ण रॅकेट उद्ध्वस्त करण्यासाठी व्यापक धडक मोहीम राबवावी, अशी मागणी होत आहे.

केमिकलपासून तयार केलेले दूध जर सर्वसामान्यांच्या घरापर्यंत पोहोचत असेल, तर हा केवळ भेसळीचा नव्हे, तर नागरिकांच्या आरोग्याशी खेळ करणारा गंभीर प्रकार आहे. या कारवाईनंतर फलटण तालुक्यातील इतर संशयित ठिकाणांवरही धडक कारवाई होणार का, याकडे सर्वांचे लक्ष लागले आहे.