राष्ट्रवादीचे माजी आमदार रमेश कदमांची शिवीगाळ प्रकरणातून दोषमुक्तता

मुंबई : राष्ट्रवादी काँग्रेसचे (ncp) मोहोळचे (जि. सोलापूर) माजी आमदार रमेश कदम यांची शिवीगाळ प्रकरणातून दोषमुक्तता करण्यात आली आहे. कदम सध्या अण्णाभाऊ साठे महामंडळामधील आर्थिक गैरव्यवहारप्रकरणी तुरुंगात आहेत. (Former MLA of NCP Ramesh Kadam acquitted in abusive case)

काँग्रेस आघाडी सरकारच्या काळात अण्णाभाऊ साठे विकास महामंडळाचे अध्यक्ष असताना कोट्यवधी रुपयांचा गैरव्यवहार केल्याचा आरोप रमेश कदम यांच्यावर आहे. या गैरव्यवहाराप्रकरणी कदम हे तुरुंगात आहेत. मुंबईच्या आर्थर रोड कारागृहात असताना कर्तव्यावर असणाऱ्या पोलिसांसोबत कदम हे शिवीगाळ करतानाचा व्हिडिओ व्हायरल झाला होता.

पोलिस अधिकाऱ्यास शिवीगाळ केल्याप्रकरणी रमेश कदम यांच्या विरोधात नागपाडा पोलिस ठाण्यात गुन्हा दाखल करण्यात आला होता. त्यानंतर पोलिसांनी आपल्याला जातीवाचक शिवीगाळ केली होती आणि २५ हजार रुपयांची लाच मागितल्याचा आरोप कदम यांनी त्या वेळी केला होता. संबंधित पोलिस अधिकारच्या विरोधात विधानसभेत हक्कभंगाचा प्रस्ताव आणण्याची धमकी दिली होती.

दरम्यान, आघाडी सरकारच्या काळात रमेश कदम हे राष्ट्रवादी काँग्रेसच्या तिकिटावर मोहोळ मतदारसंघातून निवडून आले होते. त्यांचे सोलापूरचे तत्कालीन जिल्हाधिकारी तुकाराम मुंडे यांच्यासोबतही वाजले होते. मोहोळमधील उड्डाणपुलाखालील जागेवरून मतभेद झाले होते. कदम यांनी त्यावेळी जिल्हाधिकारी कार्यालयावर मोर्चाही काढला होता. अण्णाभाऊ साठे विकास महामंडळमधील आर्थिक गैरव्यवहार प्रकरणात राष्ट्रवादीचे माजी आमदार रमेश कदम सध्या तुरुंगात आहेत.