Gokul Election : मंत्री हसन मुश्रीफ अन् महाडिकांच्या प्रयत्नांना हायकोर्टाचा धक्का : गोकुळमध्ये राज्य सरकारमार्फत बहुमत मिळवण्याचा डाव उधळला

Kolhapur News, 02 Nov : गोकुळ दूध संघात बहुमतापासून लांब राहुनही महायुतीचा शासन नियुक्त संचालकांमार्फत बहुमत मिळवण्याचा डाव मुंबई उच्च न्यायालयाच्या कोल्हापूर सर्किट बेंचने उधळून लावला आहे. येत्या १० नोव्हेंबरला होणाऱ्या अध्यक्षपदाच्या निवडणुकीत २५ संचालकांचीच मते विचारात घेतली जाणार आहेत, असे समविचारी आघाडीचे वकील कृष्णराव गणबावले यांनी स्पष्ट केले.

यापूर्वीच्या २९ ऑक्टोबर रोजी महायुतीचे १२ संचालक अनुपस्थित राहिल्याने अध्यक्ष निवडीसाठीच्या सभेचा कोरम पूर्ण झाला नाही. यावरून समविचारी आघाडीचे नवनिर्वाचित संचालक शशिकांत चुयेकर यांनी सर्किट बेंचमध्ये याचिका दाखल केली होती. यावर अध्यक्षपदाच्या निवडीसाठी १० नोव्हेंबर रोजी पुन्हा सभा घेण्याचे आदेश मुंबई उच्च न्यायालयाच्या कोल्हापूर सर्किट बेंचने दिले आहेत.

अध्यक्षपदाच्या निवडणुकीपूर्वीच शासन नियुक्त ४ संचालक नियुक्त करून त्यांना मतदानाचा अधिकार देण्याचे आणि बहुमत गाठण्याचे प्रयत्न मंत्री हसन मुश्रीफ आणि भाजप खासदार धनंजय महाडिक यांच्या स्तरावर चालू होते. मात्र त्यापूर्वीच न्यायालयाने हा डाव उधळून लावला आहे.

अॅड. गणबावले म्हणाले, आज न्यायालयाने ३ तास याचिका ऐकली. दोन्ही पक्षकारांना एकत्र येऊन सभा घ्यावी, असे निर्देश दिले. शिवाय १० तारखेला अध्यक्षपदाची निवडणूक ठेवली आहे, अशी आजच्या आज निवडून आलेल्या २५ संचालकांना नोटीस द्यायची आहे. या सभेत काय होतंय त्याबाबत ११ तारखेला दुसरी मिटींग ठेवली जाणार आहे.

पण आजच्या ऑर्डरप्रमाणे निवडून आलेल्या सदस्यांनाच नोटीस द्यायची आहे आणि तेच या सभेला उपस्थित राहू शकतात. मात्र, न्यायालयाने सभेला उपस्थित राहण्याबाबत कोणावरही सक्ती केलेली नाही. त्यामुळे आता युतीकडून सुरू असलेल्या शासन नियुक्त ४ संचालकांना मताचा अधिकार दिला तरी अध्यक्ष निवडीत ही मतं लागू होणार नाहीत. महायुतीसाठी हा मोठा धक्का मानला जात आहे.