Dhananjay Mahadik : मुन्ना - बंटी वाद पेटणार! साम, दाम दंड भेद वापरा, धनंजय महाडिकांनी थेट टार्गेटवर घेतले...

Kolhapur Gokul Election News : गोकुळ दूध संघाची निवडणूक पुन्हा एकदा गाजण्याची शक्यता आहे. यंदा ही निवडणूक महाविकास आघाडी विरुद्ध महायुती अशी होणार असली तरी यंदाची निवडणूक पुन्हा एकदा बंटी आणि मुन्ना यांच्यातील वादाला पुन्हा उकळी फोडणारी आहे. निवडणूक टप्प्यात असताना शुक्रवारी (ता.6) भाजपकडून प्राथमिक दूध संस्था, जिल्हा परिषद सदस्य आणि पंचायत समिती आणि कार्यकर्त्यांची बैठक घेत गोकुळ दूध संघाच्या निवडणुकीचे रणशिंग फुंकले.

या बैठकीत राज्यसभेचे खासदार धनंजय महाडिक यांनी, राज्यात महायुतीची सत्ता आहे. दबावाचे राजकारण चालणार नाही. गाडया बंद करतो, ठेका बंद करतो असल्या धमक्या कोणी देत असतील तर ते खपवून घेतले जाणार नाही. विरोधकांच्या कोणत्याही दडपशाहीला बळी न पडता साम-दाम-दंड-भेद या सर्वांचा वापर करा, अशा शब्दात कार्यकर्त्यांना मंत्र देऊन गोकुळच्या निवडणुकीचा प्रचार तापवला आहे.

गोकुळची निवडणूक महायुती म्हणून एकत्र लढविणार आहोत. महायुती म्हणून एकत्र लढवू आणि जिंकू ही. विरोधी काँग्रेस आघाडीचा एकही संचालक निवडून येणार नाही. विरोधकांच्या दबावाची चिंता करू नका. ज्याच्या खिशात ठराव जास्त त्याची सदस्य संख्या जास्त या दृष्टिकोनातून आपण सगळ्यांनी पुढच्या या महिन्याभरामध्ये जास्तीत जास्त ठराव जमा करावेत. असे सांगत विरोधकांच्या दडपशाहीला बळी न पडता निवडणूक जिंकण्यासाठी सगळी रसद पुरू साम, दाम, दंड, भेद या नितीचा अवलंब करा'असे आवाहनही खासदार महाडिक यांनी केले.

मंत्री चंद्रकांत पाटील, हसन मुश्रीफ, पालकमंत्री प्रकाश आबिटकर, आमदार विनय कोरे यांच्यासह महायुतीतील सर्व नेते मंडळीनी महायुती म्हणून गोकुळची निवडणूक लढविणार असल्याचा निर्णय घेतला असल्याचे महाडिक यांनी सांगितले. महाडिक म्हणाले, गोकुळच्या निवडणूकीत महाविकास आघाडीचे आव्हान नाही.

तुम्हाला सगळ्या पद्धतीचं संरक्षण करण्याची जबाबदारी ही आमच्यावर आहे. गेल्या पंचवार्षिक निवडणुकीमध्ये आपल्या सोबत धोका झाला. धोका कसा झाला, काय झालं आता त्याची चर्चा नको. पण यंदा निवडणूक जिंकायची हे ध्येय डोळ्यासमोर ठेवा, असे महाडिक म्हणाले.