Hasan Mushrif: 10 टक्क्यांच्या आरोपांवरून हसन मुश्रीफांचं राजीनामा अस्त्र : ठेकेदारांना दिलं आव्हान

Kolhapur: "सर्व आमदारांना दहा टक्के कमिशन दिले जाते, हे विधान ठेकेदारांनी मागे घ्यावे. हे चुकीचे वक्तव्य आहे. मी कोणत्याही कामात, बदली, पदोन्नतीत कमिशन, पैसे घेतलेले नाहीत. तसे असेल, तर दाखवा मी राजीनामा देतो", असे आवाहन मंत्री हसन मुश्रीफ यांनी केले. रविवारी (१४ जून) कोल्हापुर मधील ठेकेदारांनी बैठक घेऊन आमदार, मंत्री यांच्यावर टीका केली होती. त्यावर मंत्री हसन मुश्रीफ यांनी उत्तर दिले आहे.

प्रशासकांनी केवळ दैनंदिन कामे करावी. म्हणजे त्यांना त्रास होणार नाही. जे निर्णय आहेत ते येणारे संचालक मंडळ घेईल, अशी त्यांनी भूमिका ठेवावी. जिल्हा बॅंकेचे ११२ कोटी, यासह बॅंका, साखर कारखान्यांबाबतच्या चर्चेसाठी केंद्रीय सहकारमंंत्री अमित शहा यांनी इचलकरंजीमध्ये दहा मिनिटे दिल्याचेही मंत्री मुश्रीफ यांनी सांगितले.

हवामान खाते दुष्काळी परिस्थिती सांगते, त्यावेळी पंजाबराव डख पाऊस पडणार म्हणून सांगतात. तसे झाल्यास त्यांची हत्तीवरून मिरवणूक काढू. दुष्काळाची परिस्थितीसाठी आता आई अंबाबाईनेच लक्ष घालावे, अशी प्रार्थना करूया, असेही मंत्री मुश्रीफ म्हणाले.

कोल्हापुरमध्ये आयोजित महाराष्ट्र राज्य शासकीय ठेकेदार महासंघाच्या पहिल्या राज्यस्तरीय अधिवेशनात राज्यभरातील ठेकेदार मोठ्या संख्येने सहभागी झाले होते. सार्वजनिक बांधकाम, जलसंपदा, जिल्हा परिषद आणि इतर विभागांतील कामांबाबत ठेकेदारांनी आपल्या समस्या मांडल्या. यावेळी बोलताना ठेकेदारांनी शासकीय ठेक्यांच्या प्रक्रियेवर टीका केली होती.

अंदाजित रकमेपेक्षा १५ ते २० टक्के कमी दराने निविदा भरावी लागत असल्याने सुरुवातीलाच तोटा सहन करावा लागतो, असे ते म्हणाले. तसेच आमदार, अधिकारी- कर्मचारी आणि विविध करांच्या स्वरूपात एकूण ५६ टक्के रक्कम खर्च होत असल्याचा आरोप त्यांनी केला. त्यात ठेकेदारांचा नफा धरला तर ६४ टक्के रक्कम खर्च होते. त्यामुळे उर्वरित रकमेत दर्जेदार काम कसे होणार, असा सवाल ठेकेदारांनी उपस्थित केला होता.