...म्हणून विश्वराजने अमेरिकेतच राहावे, अशी माझी इच्छा होती : महाडिकांनी बोलून दाखवली मनातील गोष्ट

सोलापूर : भीमा सहकारी साखर कारखान्याच्या (Bhima sugar Factory) निवडणुकीत विश्वराज महाडिक (Vishwaraj Mahadik) महत्वाचा फॅक्टर ठरला आहे. विश्वराज याने अमेरिकेतील बोस्टन विद्यापीठात अर्थशास्त्रात पदवी घेतली आहे. त्याला एक कोटीचं पॅकेज मिळालं होतं. ते पाहता तो परत भारतात येईल की नाही, अशी शंका माझ्या मनात होती. कारण माझीही स्वतःची तशी इच्छा नव्हती. कारण एक कोटीचं पॅकेज इथं कुठं मिळणार आहे, त्यामुळे विश्वराज याने तिकडचं राहावं, अशी माझी इच्छा होती, असे खासदार धनंजय महाडिक (Dhananjay Mahadik) यांनी आज प्रथमच सांगितले. (I wanted Vishwaraj Mahadik to stay in America : Dhananjay Mahadik)

मोहोळ तालुक्यातील टाकळी सिकंदर येथील भीमा सहकारी साखर कारखान्याच्या निवडणुकीत सहकार्य केलेल्या पंढरपूर, मोहोळ, मंगळवेढा या तालुक्यातील नेते मंडळींचा सन्मान व नूतन संचालकांचा सत्कार सोहळा आयोजित करण्यात आला होता. त्यात महाडिक बोलत होते.

महाडिक म्हणाले की, भीमा कारखान्याच्या निवडणुकीत विरोधकांनी काही दिवसांपासून अपप्रचाराचे वावटळ उठवले होते. त्यांना अपेक्षित होतं की त्यांना मोठ्या प्रमाणात प्रतिसाद मिळेल. मात्र, ते जे जे बोलले, ते सर्व खोटे होतं. अपप्रचार होता, टीकाही खालच्या पातळीवर करण्यात आलेली होती.

भीमा कारखाना निवडणुकीचा सर्वांत महत्वाचा फॅक्टर हा विश्वराज धनंजय महाडिक हा आहे. मी काल मुलाखतीत सांगितलं की, विश्वराज महाडिक यांनी अमेरिकेतील बोस्टन विद्यापीठात अर्थशास्त्रात पदवी घेतली आहे. त्यांना एक कोटीचं पॅकेज मिळालं हेातं. ते पाहता तो परत भारतात येईल की नाही, अशी शंका माझ्या मनात होती. कारण माझी स्वतःची तशी इच्छा नव्हती. कारण एक कोटीचं पॅकेज इथं कुठं मिळणार आहे, त्यामुळे माझी इच्छा होती, विश्वराज याने तिकडचं राहावं. मला वाटलं आता भारतात आला आहे, तर कोल्हापुरात किंवा मुंबईत छोटा-मोठा उद्योग सुरू करेल. पण तो थेट पंढरपूर आणि मोहोळ तालुक्यातील शेतकऱ्यांच्या बांधावर आला. बॉस्टन टू मोहोळ-पंढरपूर हा त्यांचा प्रवास मला कौतुकास्पद वाटतो, अशा शब्दांत खासदारांनी आपल्या मुलाचे कौतुकही केले.