सदाभाऊ खोत यांच्यासह शेतकऱ्यांवर गोरक्षकांनी हल्ल्याचा प्रयत्न केला.
आमदार इद्रिस नायकवडी यांनी शेतकरी जनावरांची काळजी पोटच्या मुलांसारखी घेतात, असं म्हटलं.
बोगस गोरक्षकांची दडपशाही मोडून काढावी, असं आवाहन त्यांनी सरकारला केलं.
Sangli News : गेल्या काही दिवसांपासून गोरक्षणाच्या नावाखाली गोरक्षकांकडून गाड्या अडवणे आणि त्यानंतर ड्रायव्हरला मारहाण करण्याच्या घटना वाढत आहेत. अशीच घटना पुण्यातील फुरसुंगी परिसरातील द्वारकाधीश गोशाळेत घडली. येथे गोरक्षकांनी शेतकऱ्यांच्या म्हशी घेऊन गेल्याच्या प्रकरणावरून थेट रयत क्रांती संघटनेचे नेते आणि विधानपरिषदेचे आमदार सदाभाऊ खोत यांच्यासह शेतकऱ्यांवर हल्ल्याचा प्रयत्न केला. यामुळे परिसरात तणावाचे वातावरण निर्माण झाले होते. तर राज्यात खळबळ उडाली होती. यानंतर सदाभाऊ खोत यांनी या घटनेचा तीव्र निषेध व्यक्त करत गोरक्षकांच्या मनमानी कारवायांमुळे शेतकऱ्यांचे मोठे नुकसान होत असल्याचा आरोप केला होता. यादरम्यान आता अजित पवार यांच्या राष्ट्रवादी काँग्रेसचे आमदार इद्रिस नायकवडी यांनी देखील गोरक्षणाच्या नावाखाली बोगस गोरक्षकांची दुकानदारी सुरू असल्याचा आरोप केला आहे. तर ही दडपशाही मोडून काढावी, असे आव्हान महायुतीला केले आहे.
यावेळी नायकवडी यांनी, शेतकरीवर्ग आपल्या गोठ्यातील सर्वच जनावरांची पोटच्या मुलांसारखी काळजी घेत असतो. शेतकरीवर्ग आपल्या गरजेसाठी पशुधनाची विक्री करत असतात. अशावेळी आता गोरक्षकांकडून शेतकऱ्यांची अडवणूक केली जात आहे. यातूनच आमदार सदाभाऊ खोत यांच्यावर हल्लाचा प्रयत्न झाल्याचा दावा त्यांनी केला आहे. तर अशा घटना थांबवण्यासाठी गोरक्षणाच्या नावाखाली बोगस गोरक्षकांनी सुरू केलेली दडपशाही मोडून काढायला हवी असे त्यांनी म्हटलं आहे.
राज्यभरात गोरक्षकांकडून सुरू असलेले प्रकार आणि त्यातून हडपसर येथे आमदार सदाभाऊ खोत यांच्यावर गोरक्षकांनी केलेल्या हल्ल्याबाबत आमदार नायकवडी यांनी आपली भूमिका मांडली. त्यावेळी ते बोलत होते.
नायकवडी म्हणाले, ‘राज्यभरातच गोरक्षक या नावाखाली काहींनी थोतांड सुरू केले आहे. यातील काहींनी तर पशुधनाचा व्यवसायच थाटला आहे. पोलिसांना हाताशी धरून वाहनातून होणारी जनावरांची वाहतूक रोखून शेतकऱ्यांना अडथळा आणण्याचे काम हे लोक करत आहेत. गोरक्षकांनी दहशत वाढवत आता पशुधनाची वाहतूकही बंद पाडण्यास सुरुवात केली आहे.
गोवंश हत्या प्रतिबंधक कायद्याची अंमलबजावणी आवश्‍यक आहे आणि या कायद्याला कोणाचा विरोधही नाही, तरीही या तथाकथित गोरक्षकांकडून कायदा हातात घेतला जात आहे. आमदार सदाभाऊ खोत यांनी गोरक्षणाबाबत मांडलेले मुद्दे रास्त असून, त्यामुळे शेतकऱ्यांनाच न्याय मिळणार आहे, तरीही त्यांच्यावर हल्ल्याचा प्रयत्न झाला हे दुर्दैवी आहे.
राज्यभरात सुरू असलेल्या या प्रकाराबाबत विधान परिषदेत प्रश्न उपस्थित करणार आहोत. राज्यातील शांतता, सुव्यवस्था धोक्यात आणण्याचे काम या गोरक्षकांकडून सध्या सुरू आहे. त्यामुळे गोरक्षणाच्या नावाखाली काहींनी सुरू केलेल्या या प्रकाराची आता शासनाने गंभीर दखल घ्यावी आणि त्यांच्यावर कारवाई करावी, अशीही मागणी आमदार इद्रिस नायकवडी यांनी केली.
प्रश्न 1: सदाभाऊ खोत यांच्यासोबत काय घडलं?
उत्तर: काही गोरक्षकांनी त्यांच्यासह शेतकऱ्यांवर हल्ल्याचा प्रयत्न केला.
प्रश्न 2: इद्रिस नायकवडी यांनी काय विधान केलं?
उत्तर: शेतकरी जनावरांची काळजी पोटच्या मुलांसारखी घेतात आणि बोगस गोरक्षकांची दडपशाही थांबवावी, असं त्यांनी सांगितलं.
प्रश्न 3: शेतकऱ्यांना गोरक्षक का अडवतात?
उत्तर: शेतकरी जनावरं विक्री करताना गोरक्षक अडवणूक करतात.
प्रश्न 4: नायकवडींनी कोणाला आवाहन केलं?
उत्तर: बोगस गोरक्षकांविरोधात दडपशाही मोडून काढण्यासाठी सरकारला आवाहन केलं.
प्रश्न 5: या घटनेचा परिणाम काय होऊ शकतो?
उत्तर: राज्यात गोरक्षणाच्या नावाखाली शेतकऱ्यांवरील अन्यायाविरोधात मोठं आंदोलन उभं राहू शकतं.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.