Satara DCC Bank Result : जयकुमार गोरेंची सातारा Dccत दमदार एन्ट्री; शेखर गोरेंना दुहेरी आकडाही गाठता आला नाही, राष्ट्रवादीला धक्का

Satara, 03 November : सातारा जिल्हा मध्यवर्ती सहकारी बॅंकेच्या १२ जागांची मतमोजणी आज सकाळी आठपासून सुरू आहे. सर्वाधिक चर्चा झालेल्या माण सोसायटी मतदारसंघातून भाजप नेते तथा राज्याचे ग्रामविकास मंत्री जयकुमार गोरे हे तब्बल ३९ मतांनी विजयी झाले आहेत. सर्वाधिक चर्चा झालेले त्यांचे बंधू शेखर गोरेंना मताचा दुहेरी आकडाही गाठता आला नाही.

जिल्हा बॅंकेच्या २१ जागांपैकी नऊ जागा बिनविरोध झाल्या आहेत. उर्वरित १२ जागांसाठी रविवारी ९८ टक्के मतदान झाले होती, त्याची मतमोजणी आज सकाळी आठपासून सुरू आहे. त्यातील माण सोसायटी गटातून राज्याचे ग्रामविकास मंत्री जयकुमार गोरे यांनी ३९ मतांनी विजय मिळवित जिल्हा बॅंकेत दमदारपणे एन्ट्री केली आहे.

माण सोसायटी गटातून मंत्री जयकुमार गोरे यांना ५३ मते मिळाली आहे. त्यांचे बंधू आणि शिवसेना नेते शेखर गोरे यांना दुहेरी आकडाही गाठता आला नाही. त्यांना केवळ ७ मतांवर समाधान मानावे लागले आहे. राष्ट्रवादी काँग्रेसचे मनोजकुमार पोळ यांना १४ मते पडली आहेत, त्यामुळे गोरे यांनी पाहिल्याच निवडणुकीत जिल्हा बॅंकेत झोक्यात प्रवेश केला आहे.

दरम्यान, पाटण सोसायटी मतदारसंघातून पालकमंत्री तथा शिवसेना नेते शंभूराज देसाई यांनी विद्यमान संचालक तथा भाजप नेते सत्यजित पाटणकर यांना पराभूत करत मागील निवडणुकीत झालेल्या पराभवाचे उट्टे काढले आहे. या निवडणुकीत शंभूराज देसाई यांना ५८ मते मिळाली असून सत्यजित पाटणकर यांना ४६ मतांवर समाधान मानावे लागले आहे.

फलटण सोसायटी गटातून शिवसेनेचे संजीवराजे नाईक निंबाळकर यांनी भाजपचे समशेरसिंह नाईक निंबाळकर यांच्यावर दणदणीत मतांनी पराभव केला आहे. या लढतीत संजीवराजे नाईक निंबाळकर यांना ७१ मते मिळाली आहेत, तर समशेरसिंह नाईक निंबाळकर यांना ६० मतं पडली आहेत. या विजयाच्या निमित्ताने माजी सभापती रामराजे नाईक निंबाळकर यांनी माजी खासदार रणजितसिंह नाईक निंबाळकर यांना धोबीपछाड दिली आहे.