Hasan Mushrif : मंत्री हसन मुश्रीफांची सून कागल नगरपरिषदेवर बिनविरोध : टीका करणारा मंडलिक गटच धावला मदतीला

Kalag NagarParishad : कागल नगरपरिषद निवडणुकीत मंत्री हसन मुश्रीफ यांच्या सूनबाई सेहरनिदा मुश्रीफ या बिनविरोध निवडून आल्या आहेत. प्रभाग क्रमांक 9 मधून मंडलिक गटाच्या नूरजहा नायकवडी यांनी बुधवारी अर्ज माघारी घेतला. त्यानंतर सेहरनिदा यांची बिनविरोध निवड झाली. सेहरनिदा या हसन मुश्रीफ यांचे पुतणे नवाज यांच्या पत्नी आहेत.

नगरपालिका निवडणुकीच्या रणधुमाळीत कागल नगरपरिषदेमध्ये महत्त्वाच्या घडामोडी घडत आहेत. मंत्री हसन मुश्रीफ आणि शाहू ग्रुपचे अध्यक्ष समरजीत घाटगे एकत्र आल्यानंतर सर्वांनाच अनपेक्षितपणे धक्का मिळाला. मात्र या युतीवर माजी खासदार संजय मंडलिक यांनी घाटगे यांनी मंत्री मुश्रीफ यांच्यावर आगपाखड केली होती.

मंडलिक गट मदतीला :

लोकसभा निवडणुकीत घाटगे आणि मुश्रीफ यांनी आपल्याला फसवलं असल्याचा आरोप माजी खासदार संजय मंडलिक यांनी केला होता. हा आरोप करून 24 तास उलटले नसताना माजी मंडलिक यांचा गट मुश्रीफ यांच्या मदतीला धावला आहे. मंडलिक यांनी घाटगे आणि मुश्रीफ गटाविरोधात 23 जागांवर उमेदवार उभे केले होते.

काय म्हणाले होते संजय मंडलिक?

कोल्हापूर लोकसभा मतदारसंघातून माजी खासदार संजय मंडलिक यांचा महायुतीतून पराभव झाल्यानंतर त्यांचे पुत्र वीरेंद्र मंडलिक यांनी वैद्यकीय शिक्षण मंत्री हसन मुश्रीफ आणि तात्कालीन भाजपचे नेते समरजीत घाटगे यांना पराभवाला कारणीभूत ठरवून आरोप केले होते. पण, महायुतीचा धर्म म्हणून खासदार संजय मंडलिक यांनी आपल्या मुलाला आरोप करण्यपासून रोखले होते.

मात्र, मुश्रीफ आणि घाटगे एकत्र येताच मंडलिक यांनीच आरोप करुन लोकसभेला आपल्या पराभवासाठी हे दोघेच कारणीभूत असल्याचा आरोप केला आहे. कार्यकर्त्यांसाठी नव्हे तर सत्तेसाठी हे दोघे एकत्र आले आहेत. दोघांनीही कार्यकर्त्यांची फसवणूक केली आहे. यापूर्वी जे निर्णय झालेत ते कार्यकर्त्यांना विचारत घेऊन निर्णय झालेत. आता कार्यकर्त्यांना समजावून काय उपयोग? इंग्रजांनी जो 'सॉरी' शब्द काढला तो लाथ मारून झाल्यावर म्हणतात. त्यामुळं आता जनतेला दोघांनी लाथ मारली आहे, मग सॉरी म्हणत आहेत. अशी टीका मंडलिक यांनी केली होती.